കൊയിലാണ്ടി: കീഴരിയൂരിലുണ്ടായ സംഘര്‍ഷത്തില്‍ മൂന്ന് ആര്‍.എസ്.എസ് പ്രവര്‍ത്തകര്‍ക്ക് വെട്ടേറ്റു.
ആര്‍.എസ്. എസ് കീഴരിയൂര്‍ മണ്ഡലം കാര്യവാഹ് തത്തംവള്ളി പൊയില്‍ തെക്കെ അവണികുഴിയില്‍ സുധീഷ് (22), സൗഭാഗ്യയില്‍ ബിനീഷ് (24), കിഴക്കഴില്‍ രാഹുല്‍ (26) എന്നിവക്കാണ് വെട്ടേറ്റത്. ഇവരെ കൊയിലാണ്ടി താലൂക്ക് ആശുപത്രിയിലെ ചികിത്സയ്ക്ക് ശേഷം കോഴിക്കോട് മെഡിക്കല്‍ കോളജ് ആശുപത്രിയിലേക്ക് മാറ്റി. ഇന്നലെ വൈകിട്ട് 5.30ഓടെയായിരുന്നു സംഭവം. അക്രമത്തിന് പിന്നില്‍ സി.പി.എമ്മാണന്ന് ആര്‍.എസ്.എസ് നേതാക്കള്‍ ആരോപിച്ചു.
സുധീഷിനെ വീടുവളഞ്ഞ് അക്രമിക്കുകയായിരുന്നു. വീടുവളഞ്ഞ വിവരം അറിഞ്ഞ് എത്തിയതായിരുന്നു രാഹുലും, ബീനീഷും. നേരത്തെ സുധീഷിനു സി.പി.എംപ്രവര്‍ത്തകരില്‍ നിന്നു ഭീഷണിയുണ്ടായിരുന്നു. ഇതുമായി ബന്ധപ്പെട്ട് കൊയിലാണ്ടി പൊലിസില്‍ പരാതി നല്‍കുകയും ഇരുകൂട്ടരുമായും പൊലിസ് ചര്‍ച്ച നടത്തുകയും ചെയ്തിരുന്നു.
ഇന്നലെ കാലത്തും സുധീഷിനെ സി.പി.എം പ്രവര്‍ത്തകര്‍ ഭീഷണിപ്പെടുത്തിയിരുന്നതായി പറയുന്നു. ഇതേ തുടര്‍ന്ന് പൊലിസ് ഈ പ്രദേശത്ത് പിക്കറ്റ് ഏര്‍പ്പെടുത്തിയിരുന്നു. പൊലിസ് മാറിയ ഉടനെയാണ് അക്രമമുണ്ടായതെന്ന് ആര്‍.എസ്.എസ് നേതാക്കള്‍ പറഞ്ഞു.
സുധീഷ് ഞായറാഴ്ച ഗള്‍ഫിലേക്ക് പോകാനിരിക്കുകയായിരുന്നു. സുധീഷിന് കൈക്കും മുഖത്തുമാണ് വെട്ടേറ്റത്. സ്ഥലത്ത് പൊലിസ് കാവല്‍ ശക്തമാക്കിയിട്ടുണ്ട്.