ഹൈദരാബാദ്: പൗരത്വ നിയമ ഭേദഗതിക്കെതിരേ പ്രതിഷേധിക്കുന്നവര്‍ക്കെതിരേ ഡല്‍ഹിയില്‍ നടക്കുന്ന ആക്രമങ്ങളില്‍ ബി.ജെ.പി നേതാവ് കപില്‍ മിശ്രയേയും പ്രധാനമന്ത്രി നരേന്ദ്രമോദിയെയും വിമര്‍ശിച്ച് എ.ഐ.എം.ഐ.എം അധ്യക്ഷന്‍ അസദുദ്ദീന്‍ ഉവൈസി രംഗത്ത്. താങ്കള്‍ വളര്‍ത്തിയ പാമ്പുകള്‍ താങ്കളെത്തന്നെ കൊത്തുമെന്ന് ഉവൈസി മോദിയോട് പറഞ്ഞു.

'പ്രധാനമന്ത്രി മോദി, ഞങ്ങള്‍ക്കു നിങ്ങളോട് ഒന്നേ പറയാനുള്ളൂ, നിങ്ങളുടെ തോട്ടത്തില്‍ നിങ്ങള്‍ വളര്‍ത്തുന്ന പാമ്പുകള്‍ നിങ്ങളെത്തന്നെ തിരിഞ്ഞുകൊത്തും' അദ്ദേഹം പറഞ്ഞു. ബി.ജെ.പി നേതാവും മുന്‍ എം.എല്‍.എയുമായ ഒരാളുടെ പ്രേരണയുടെ ഫലമാണ് ഈ കലാപം. പൊലിസിന്റെ പങ്കിനെക്കുറിച്ചും ഇപ്പോള്‍ വ്യക്തമായ തെളിവുകളുണ്ട്. ആ മുന്‍ എം.എല്‍.എയെ എത്രയും പെട്ടെന്ന് അറസ്റ്റ് ചെയ്യണം. കലാപം അവസാനിപ്പിക്കാന്‍ അടിയന്തര നടപടികള്‍ സ്വീകരിക്കണം. മറിച്ചാണെങ്കില്‍ ഇതു വ്യാപിക്കുമെന്നും ഉവൈസി പറഞ്ഞു.

പ്രതിഷേധക്കാരെ റോഡില്‍നിന്ന് ഒഴിപ്പിച്ചില്ലെങ്കില്‍ തങ്ങള്‍ തെരുവിലിറങ്ങുമെന്നു കപില്‍ മിശ്ര കഴിഞ്ഞ ദിവസം ഭീഷണി മുഴക്കിയിരുന്നു. ജാഫ്രാബാദിനടുത്തുള്ള മുജ്പൂരില്‍ നടത്തിയ പൗരത്വ നിയമ ഭേദഗതി അനുകൂല പരിപാടിയിലായിരുന്നു കപില്‍ മിശ്രയുടെ ഭീഷണി.