കൊണ്ടോട്ടി: അക്രമം അഴിച്ചുവിട്ട് അസമിലെ മുസ്‌ലിം ഭൂരിപക്ഷ  മണ്ഡലങ്ങള്‍ സംഘ്പരിവാര്‍ അവരുടേതാക്കി മാറ്റുകയാണെന്ന് അസമിലെ വിദ്യാഭ്യാസ പ്രവര്‍ത്തകനും കോണ്‍ഗ്രസ് എം.എല്‍.എയുമായ ശേര്‍മാന്‍ അലി അഹമ്മദ്. ഇന്നു കോഴിക്കോട്ട് നടക്കുന്ന സമസ്ത കേരള ഇസ്‌ലാം മത വിദ്യാഭ്യാസ ബോര്‍ഡിന്റെ പരിപാടിയില്‍ പങ്കെടുക്കാനെത്തിയ അദ്ദേഹം 'സുപ്രഭാത'ത്തോട് സംസാരിക്കുകയായിരുന്നു.  മുസ്‌ലിംകളുള്ള നിയമസഭാ മണ്ഡലങ്ങള്‍ കുറയ്ക്കുകയാണ് അവരുടെ ലക്ഷ്യം. സ്വാതന്ത്ര്യത്തിനു ശേഷം സംസ്ഥാനത്ത് മുസ്‌ലിംകള്‍ പീഡനം അനുഭവിക്കുന്നുണ്ട്. എന്‍.ആര്‍.സി വിഷയത്തില്‍ അസം സഹോദരങ്ങള്‍ വര്‍ഷങ്ങളായി അനുഭവിക്കുന്ന ദുരിതമാണ് ഇന്നു മാതൃരാജ്യത്തെ സ്‌നേഹിക്കുന്ന ഓരോ ഭാരതീയനും അനുഭവിക്കുന്നത്. രാജ്യ തലസ്ഥാനത്ത് മുസ്‌ലിം വേട്ടയാണു നടക്കുന്നത്.  പിറന്ന നാട്ടില്‍ അന്യനാട്ടുകാരായി കഴിയേണ്ട അവസ്ഥയാണുള്ളത്.  രാജ്യതലസ്ഥാനം കത്തിക്കുമ്പോള്‍ ഭരണാധികാരികള്‍ കണ്ടില്ലെന്നു നടക്കുകയാണെന്നും അദ്ദേഹം കുറ്റപ്പെടുത്തി. 

ചെമ്മാട് ദാറുല്‍ ഹുദായുടെ പ്രവര്‍ത്തനങ്ങള്‍ ഏറെ പ്രതീക്ഷയോടെയാണ് കാണുന്നതെന്നും അദ്ദേഹം പറഞ്ഞു. ഇന്നലെ രാത്രി 9.30നാണ് ശേര്‍മാന്‍ അലി അഹമ്മദ് കരിപ്പൂര്‍ വിമാനത്താവളത്തിലെത്തിയത്. അസം ബാര്‍പെട്ട് ജില്ലയിലെ ഭാഗ്ബര്‍ മണ്ഡലത്തില്‍ 2011 മുതല്‍ എം.എല്‍.എയാണ്.