റിയാദ്: ലോകത്തെ വിവിധയിടങ്ങളിലെ കലയും സംസ്കാരവും പരിചയപ്പെടാം സഊദിയിലെ ഗ്ലോബൽ വില്ലേജിൽ.  സഊദി ടൂറിസം വകുപ്പ് സഹകരണത്തോടെ അടുത്ത മാസം 28 മുതൽ ആരംഭിക്കുന്ന ഗ്ലോബൽ വില്ലേജിൽ അൻപത് രാജ്യങ്ങളാണ് പങ്കെടുക്കുന്നത്. 

 

         ജിദ്ദയിലെ അതല്ല ഹാപ്പിലാന്‍ഡ് പാര്‍ക്കില്‍ ഫെബ്രുവരി 28 മുതല്‍ മാര്‍ച്ച് 29 വരെ നടക്കുന്ന ഗ്ലോബൽ വില്ലേജിൽ പത്ത് ലക്ഷം പേരെയാണ് പ്രതീക്ഷിക്കുന്നതെന്ന് അധികൃതര്‍ അറിയിച്ചു. 45,000 ചതുരശ്ര മീറ്റര്‍ വിസ്തൃതിയില്‍ സജ്ജമാക്കുന്ന ആഗോള ഗ്രാമത്തില്‍ വിവിധ രാജ്യങ്ങളുടെ കലയും സാംസ്‌കാരവും അടുത്തറിയാം. വില്ലേജിനെ കൂടുതൽ ആകർഷകമാക്കി വ്യത്യസ്ത രാജ്യക്കാരുടെ വിനോദ പരിപാടികളും അരങ്ങേറും.  ഒരു മാസം നീണ്ടുനില്‍ക്കുന്ന ഉത്സവത്തിലേക്ക് വൈകിട്ട് അഞ്ചു മുതല്‍ അര്‍ധരാത്രി വരെയാണ് പ്രവേശനം.

 

        വിനോദ സഞ്ചാരികളെ ആകര്‍ഷിക്കുക എന്ന ലക്ഷ്യത്തോടെ ഇന്റര്‍നാഷനല്‍ ഇമേജ് ആണ് ആഗോള ഗ്രാമം സംഘടിപ്പിക്കുന്നത്.  10 അറബ് രാജ്യങ്ങള്‍ക്കു പുറമേ 18 ആഫ്രിക്കന്‍ രാജ്യങ്ങളുടെയും 10 യൂറോപ്യന്‍ രാജ്യങ്ങളുടെയും അമേരിക്ക മേഖലയില്‍നിന്നുള്ള 4 രാജ്യങ്ങളുടെയും പവിലിയനുകളുണ്ടാകും. തനത് നാടോടി കലകള്‍ക്കാണ് ഓരോ രാജ്യവും മുന്‍ഗണന നല്‍കുക. വിവിധ രാജ്യങ്ങളില്‍നിന്നുള്ള ഉല്‍പന്നങ്ങള്‍ വാങ്ങാനും ഭക്ഷണം രുചിക്കാനും അവസരമുണ്ട്.