ന്യൂഡല്‍ഹി: കോണ്‍ഗ്രസ് വിട്ട് ബി.ജെ.പിയിലേക്ക് പോവാനുള്ള ജ്യോതിരാദിത്യ സിന്ധ്യയുടെ തീരുമാനത്തെ പരിഹസിച്ച് മുതിര്‍ന്ന നേതാവ് ദിഗ്‌വിജയ് സിങ്. പാര്‍ട്ടിവിട്ട് മോദി ഷാ ഭരണത്തിന് കീഴിലേക്ക് മാറുന്ന സിന്ധ്യക്ക് എല്ലാവിധ ആശംസകളും നേരുന്നതായി ദിഗ്‌വിജയ് സിങ് ട്വീറ്റ് ചെയ്തു.

ബി.ജെ.പിയിലേക്ക് മാറുന്നതോടെ ജ്യോതിരാദിത്യ സിന്ധ്യക്ക് മോദി ഷാ സര്‍ക്കാറിന് കീഴിലുള്ള ഭാവി ഇന്ത്യയില്‍ വളരാന്‍ കഴിയും. നമ്മുടെ ബാങ്കുകള്‍ പൊളിയുകയും രൂപയുടെ മൂല്യം ഇടിയുകയും സാമ്പത്തിക വ്യവസ്ഥയും സാമൂഹികാവസ്ഥയും പൂര്‍ണമായും തകരുകയും ചെയ്ത സാഹചര്യത്തില്‍ സിന്ധ്യക്ക് ബി.ജെ.പിയില്‍ കൂടുതല്‍ കാര്യങ്ങള്‍ ചെയ്യാനുണ്ടാകുമെന്നും ദിഗ്‌വിജയ് സിങ് ട്വിറ്ററില്‍ കുറിച്ചു.

കേന്ദ്രമന്ത്രിമാരായ അമിത് ഷാക്കോ നിര്‍മല സീതാരാമനോ പകരമുള്ള സ്ഥാനം ലഭിച്ചേക്കും. ഇവരെക്കാള്‍ നന്നായി ആ പദവികള്‍ കൈകാര്യം ചെയ്യാന്‍ സിന്ധ്യക്ക് കഴിവുണ്ടെന്ന് അറിയാം. മോദിഷാ നേതൃത്വത്തിന് കീഴില്‍ പ്രവര്‍ത്തിക്കാന്‍ സിന്ധ്യക്ക് ആശംസകള്‍ നേരുന്നതായും അദ്ദേഹം കൂട്ടിച്ചേര്‍ത്തു.

സിന്ധ്യയെ കോണ്‍ഗ്രസ് ഒരിക്കലും അരികുചേര്‍ത്തിട്ടില്ലെന്ന് അദ്ദേഹം ചൂണ്ടിക്കാട്ടി. മധ്യപ്രദേശില്‍ കോണ്‍ഗ്രസ് ഭരണത്തിലെത്തിയ ശേഷം ഇതുവരെ സംസ്ഥാനത്തെ ഒരു കാര്യങ്ങളും സിന്ധ്യയെ അറിയിക്കാതെയോ അദ്ദേഹത്തിന്റെ അനുമതി ഇല്ലാതെയോ ചെയ്തിട്ടില്ല. ഇക്കാര്യം ഗ്വാളിയോര്‍ ചമ്പല്‍ ഡിവിഷനിലെ ആരോടു ചോദിച്ചാലും വ്യക്തമാകുമെന്നും ദിഗ് വിജയ് സിങ് പറഞ്ഞു.

രാജ്യസഭ തെരഞ്ഞെടുപ്പിനെ ചൊല്ലിയുള്ള അഭിപ്രായവ്യത്യാസങ്ങളെ തുടര്‍ന്ന് കഴിഞ്ഞ ദിവസമാണ് ജ്യോതിരാദിത്യ സിന്ധ്യ കോണ്‍ഗ്രസില്‍ നിന്നും രാജിവെച്ചത്. സിന്ധ്യയുമായി അടുപ്പമുള്ള 22 എം.എല്‍.എമാരും രാജിവെച്ചിരുന്നു.