പാലക്കാട്: കഞ്ചാവ് കടത്തിയതിന് അറസ്റ്റിലായ ആര്‍.എസ്.എസ് പ്രവര്‍ത്തകനോട് കയ്യില്‍ കെട്ടിയിരിക്കുന്ന രാഖി ഊരി മാറ്റാന്‍ ആവശ്യപ്പെടുന്ന മറ്റൊരു സംഘപ്രവര്‍ത്തകന്റെ വീഡിയോ വൈറലാവുന്നു.

തമിഴ്‌നാട്ടിലെ സേലത്തുനിന്ന് പാലക്കാട് വഴി കഞ്ചാവ് കടത്തുന്നതിനിടെയാണ് ആര്‍.എസ്.എസ് പ്രവര്‍ത്തകരായ വിഷ്ണു, അലോക്, ജിനോപോള്‍ എന്നിവര്‍ പൊലിസ് പിടിയിലായത്. ഇവരെ പിടികൂടിയതോടെ നാട്ടുകാര്‍ മൊബൈലില്‍ ദൃശ്യങ്ങള്‍ പകര്‍ത്താന്‍ തുടങ്ങി. ഇതിനിടയിലാണ് പ്രതികളിലൊരാളോട് മറ്റൊരു ആര്‍.എസ്.എസ് പ്രവര്‍ത്തകന്‍ രാഖി ഊരിമാറ്റാന്‍ ആവശ്യപ്പെട്ടത്. പിന്നീട് പ്രതി രാഖി കൈകൊണ്ട് മറച്ചുപിടിക്കുന്നതായി ദൃശ്യങ്ങളില്‍ കാണാം.

ആറു ലക്ഷത്തോളം രൂപ വില വരുന്ന കഞ്ചാവാണ് ഇവര്‍ കടത്താന്‍ ശ്രമിച്ചത്. വാളയാര്‍ ടോള്‍ പ്ലാസയില്‍ വച്ച് ഇവരുടെ വാഹനത്തെ പൊലിസ് കൈ കാണിച്ചെങ്കിലും നിര്‍ത്താതെ പോവുകയായിരുന്നു. പിന്നീട് ഇവരെ പിന്തുടര്‍ന്ന് പിടികൂടുകയായിരുന്നു പൊലിസ്.