പുതുക്കാട്: കൊയ്ത് കഴിഞ്ഞ് ഒരാഴ്ചയായിട്ടും സംഭരിക്കാതിരുന്ന വേലൂപ്പാടം പാടശേഖരത്തിലെ ടണ്‍ കണക്കിന് നെല്ല് സംഭരിക്കാന്‍ സപ്ലൈകോ നടപടിയെടുത്തു. തിങ്കളാഴ്ച രാവിലെ സപ്ലൈകോ ചുമതലപെടുത്തിയ മില്ലുടമകള്‍ പാടശേഖരത്തിലെ എല്ലാ കര്‍ഷകരുടെയും നെല്ല് സംഭരിക്കും. സുപ്രഭാതം വാര്‍ത്തയെ തുടര്‍ന്നാണ് നടപടി. വാര്‍ത്ത ശ്രദ്ധയില്‍പ്പെട്ട ജില്ലാ സപ്ലൈകോ ഓഫിസറുടെ നിര്‍ദേശപ്രകാരം രണ്ട് ജീവനക്കാര്‍ പാടശേഖരത്തില്‍ എത്തിയാണ് കര്‍ഷകര്‍ക്ക് ഉറപ്പ് നല്‍കിയത്. പാടത്ത് നിരത്തിയിട്ടിരിക്കുന്ന നെല്ല് ചാക്കുകളിലാക്കുവാനും ഉദ്യോഗസ്ഥര്‍ നിര്‍ദേശം നല്‍കി. വരന്തരപ്പിള്ളി പഞ്ചായത്തംഗങ്ങളായ കൃഷ്ണന്‍കുട്ടി പൊട്ടനാട്ട്, ബിന്ദു പ്രിയന്‍, കൃഷി ഓഫിസര്‍ ഡോ. എസ്. സ്വപ്ന എന്നിവരും പാടശേഖരത്തില്‍ എത്തിയിരുന്നു. ഓരോ കര്‍ഷകരുടെയും നെല്ല് ഉദ്യോഗസ്ഥര്‍ പരിശോധിച്ചു. പരിശോധനയില്‍ നെല്ലില്‍ ഈര്‍പ്പം ഉണ്ടെന്ന് ഉദ്യോഗസ്ഥര്‍ പറഞ്ഞത് കര്‍ഷകരുമായി തര്‍ക്കത്തിനിടയാക്കി.  രണ്ട് മണിക്കൂര്‍ നീണ്ട തര്‍ക്കത്തിനൊടുവില്‍ മുകള്‍തട്ടിലെ നെല്ല് ചാക്കുകളിലാക്കാനും മറ്റുള്ളവ തിങ്കളാഴ്ച വരെ ഉണക്കാനും തീരുമാനമെടുക്കുകയായിരുന്നു. ഒരാഴ്ചയായി പാടത്ത് ഇട്ട് ഉണക്കിയ നെല്ലില്‍ ഈര്‍പ്പം ഉണ്ടെന്ന് പറഞ്ഞ് നെല്ല് സംഭരിക്കാതിരിക്കാനുള്ള ഉദ്യോഗസ്ഥരുടെ നടപടിയില്‍ പ്രതിഷേധിച്ച് ഒരു കൂട്ടം കര്‍ഷകര്‍ നെല്ല് കത്തിക്കാന്‍ തീരുമാനിച്ചു.
പിന്നീട് ഉദ്യോഗസ്ഥര്‍ തന്നെ ഇടപെട്ടാണ് കര്‍ഷകരെ ശാന്തരാക്കിയത്. പാടശേഖര സമിതിയിലെ ഭൂരിഭാഗം കര്‍ഷകരും സ്ഥലത്തെത്തിയിരുന്നു.