തൃക്കരിപ്പൂര്‍: വലിയ കെട്ടിടവും മുറ്റം നിറയെ രോഗികളും പേരില്‍ താലൂക്ക് ആശുപത്രി. സാമൂഹ്യ ആരോഗ്യ കേന്ദ്രത്തില്‍നിന്ന് വര്‍ഷങ്ങള്‍ക്ക് മുന്‍പ് താലൂക്ക് ആശുപത്രിയെന്ന് പേരില്‍ ഉയര്‍ച്ചയുണ്ടായെങ്കിലും ആശുപത്രി സൗകര്യങ്ങള്‍ താലൂക്ക് ആശുപത്രി നിലവാരത്തിലേക്ക് ഉയര്‍ന്നിട്ടില്ല. ആശുപത്രിയില്‍ സാമൂഹ്യാരോഗ്യ കേന്ദ്രത്തിലെ സ്റ്റാഫ് പാറ്റേണാണ് ഇപ്പോഴും നിലനില്‍ക്കുന്നത്. താലൂക്ക് ആശുപത്രിയില്‍ 100 ബെഡ് വേണം.
എന്നാല്‍ ഇവിടെ 40 ബെഡ് മാത്രമാണുളളത്. താലൂക്ക് ആശുപത്രി സൂപ്രണ്ട് തസ്തിക ഇതുവരെയും അനുവദിച്ചിട്ടില്ല. ഗൈനോക്കോളജി ഡോക്ടര്‍ ഉണ്ടെങ്കിലും ലേബര്‍മുറിയോ വാര്‍ഡോ ഒരുക്കിയിട്ടില്ല. താലൂക്ക് ആശുപത്രിയില്‍ വേണ്ട അനസ്‌തേഷ്യ, കണ്ണ് വിദഗ്ദന്‍, മെഡിസിന്‍ വിഭാഗം, സര്‍ജറി, എക്‌സ്‌റേ, ഇ.എന്‍.ടി, ആബുലന്‍സ് സംവിധാനം എന്നിവ ഇതുവരെയായിട്ടും ഒരുക്കിയിട്ടില്ല.
2017 ഏപ്രില്‍ 13ന് താലൂക്ക് ആശുപത്രിയില്‍ പണിത എന്‍ഡോസള്‍ഫാന്‍ കെട്ടിട ഉദ്ഘാടന വേളയില്‍ ആരോഗ്യ മന്ത്രി കെ.കെ ശൈലജ തൃക്കരിപ്പൂര്‍ താലൂക്ക് ആശുപത്രിയില്‍ അമ്മയും കുഞ്ഞും ബ്ലോക്ക് ഉടനെ സ്ഥാപിക്കുമെന്ന് പ്രഖ്യാപനം നടത്തിയിരുന്നു.
എന്നാല്‍ രണ്ടുവര്‍ഷം പൂര്‍ത്തിയാകുന്ന വേളയില്‍ അമ്മയും കുഞ്ഞും ബ്ലോക്കിന്റെ പ്രാഥമിക നടപടിപോലും തുടങ്ങിയില്ല.
ദിവസവും 500ലധികം രോഗികളാണ് തൃക്കരിപ്പൂര്‍ താലൂക്ക് ആശുപത്രിയിലെത്തുന്നത്. പലപ്പോഴും ഉച്ചകഴിഞ്ഞാല്‍ ആശുപത്രിയില്‍ ഡോക്ടര്‍ ഉണ്ടാവാറുമില്ല.