റിയാദ്: ഈ വര്‍ഷം ഉംറ സീസണ്‍ ആരംഭിച്ച ശേഷം ഇത് വരെ ഇഷ്യു ചെയ്തത് 35 ലക്ഷം ഉംറ വിസകള്‍. ഇതില്‍ 30 ലക്ഷത്തിലധികം ഉംറ തീര്‍ത്ഥാടകര്‍ പുണ്യ ഭൂമിയില്‍ എത്തിച്ചേര്‍ന്നതായും അധികൃതര്‍ അറിയിച്ചു. കഴിഞ്ഞ ജനുവരി 31 വരെയുള്ള കണക്കുകളാണിത്. ഉംറ ആഴ്ച്ച സൂചിക പ്രകാരം 3,486,363 ഉംറ വിസകള്‍ അനുവദിക്കുകയും 3,020,686 തീര്‍ത്ഥാടകര്‍ പുണ്യഭൂമിയില്‍ എത്തിച്ചേരുകയും ചെയ്തിട്ടുണ്ട്. ജനുവരി അവസാന ദിനം വരെ 2,553,669 തീര്‍ത്ഥാടകര്‍ വിശുദ്ധ ഉംറ തീര്‍ത്ഥാടനം പൂര്‍ത്തിയാക്കി പുണ്യ ഭൂമിയില്‍ നിന്നും സ്വദേശങ്ങളിലെക്ക് യാത്ര തിരിച്ചു.

ഇതുവരെ എത്തിയ തീര്‍ഥാടകരില്‍ 3,17,948 റോഡ് മാര്‍ഗ്ഗവും 21,875 തീര്‍ത്ഥാടകര്‍ കപ്പല്‍ മാര്‍ഗ്ഗവുമാണ് എത്തിച്ചേര്‍ന്നത്. പാകിസ്താനില്‍ നിന്നുള്ള തീര്‍ത്ഥാടകരാണ് ഏറ്റവും മുന്നില്‍. 650,053 തീര്‍ത്ഥാടകരാണ് ഇവിടെ നിന്നും ഇതിവരെയെത്തിയത്. രണ്ടാം സ്ഥാനത്തുള്ള ഇന്തോനേഷ്യയില്‍ നിന്നും 471,706 തീര്‍ത്ഥാടകരും മൂന്നാം സ്ഥാനത്തുള്ള ഇന്ത്യയില്‍ നിന്നും 303,984 ഉംറ തീര്‍ത്ഥാടകരാണ് ഇത് വരെ പുണ്യ ഭൂമിയില്‍ എത്തിച്ചേര്‍ന്നത്.

ഉംറ തീര്‍ത്ഥാടകരുടെ കണക്കുകള്‍ കൃത്യമായി ലഭിക്കുവാനായി ഈ വര്‍ഷാരംഭത്തിലാണ് ആഴ്ച്ച സൂചിക കൊണ്ട് വന്നത്. സഊദി വിഷന്‍ 2030 പ്രകാരം മൂന്നു കോടി തീര്‍ഥാടകരെയാണ് വര്‍ഷം തോറും ലക്ഷ്യമാക്കുന്നത്. ഇതിന്റെ മുന്നോടിയായി ഓരോ വര്‍ഷവും ഉംറ തീര്‍ത്ഥാടകരുടെ എണ്ണത്തില്‍ ഘട്ടം ഘട്ടമായ വര്‍ധനവാണ് കൊണ്ടുവരുന്നത്.