മംഗളൂരു: നാല് കാസര്‍കോട് സ്വദേശികള്‍ക്കു കൊവി ഡ് 19 കണ്ടെത്തി. ഇന്നലെ മംഗളൂരുവില്‍ കൊവിഡ് സ്ഥിരീകരിച്ച നാല് പേരില്‍ മൂന്നു പേര്‍ മംഗളൂരുവിലെ ഗവ. വെന്‍ലോക്ക് ആശുപത്രിയിലും ഒരാള്‍ കെ.എം.സി ആശുപത്രിയിലും ഐസൊലേഷന്‍ വാര്‍ഡുകളില്‍ ചികിത്സയിലാണ്.കഴിഞ്ഞ ദിവസം മംഗളൂരുവില്‍ ഭട്ക്കല്‍ സ്വദേശിയായ യുവാവിന് കൊവിഡ് സ്ഥിരീകരിച്ചിരുന്നു. ഇതിനു പിന്നാലെയാണ് മംഗളൂരു വിമാനത്താവളത്തില്‍ വന്നിറങ്ങിയ മൂന്നു പേര്‍ക്കും കരിപ്പൂര്‍ വിമാനത്താവളം വഴിയെത്തിയ മറ്റൊരു സ്ത്രീക്കും ഉള്‍പ്പെടെ നാല് കാസര്‍കോട് സ്വദേശികള്‍ക്കു കൊവിഡ് 19 സ്ഥിരീകരിച്ചത്.
ഈമാസം 20ന് വൈകുന്നേരം 5.30ന് ദുബൈയില്‍നിന്നു വന്ന സ്‌പൈസ് ജെറ്റ് വിമാനത്തില്‍ മംഗളൂരുവില്‍ ഇറങ്ങിയ 32കാരന്‍, 19ന് പുലര്‍ച്ചെ 5 നു ദുബൈയില്‍നിന്നും വന്ന എയര്‍ ഇന്ത്യ വിമാനത്തില്‍ എത്തിയ 47കാരന്‍, 20ന് വൈകുന്നേരം 5.30ന് ദുബൈയില്‍നിന്ന് എത്തിയ സ്‌പൈസ് ജെറ്റില്‍ യാത്ര ചെയ്ത 23 വയസുകാരന്‍ എന്നിവര്‍ക്കു പുറമെ മാര്‍ച്ച് 9 നു സൗദിയില്‍നിന്നു കരിപ്പൂര്‍ വഴിയെത്തിയ 70 കാരിക്കുമാണ് കൊവിഡ് സ്ഥിരീകരിച്ചത്.
ഇവരില്‍ പുരുഷന്മാരായ മൂന്നു പേരും രോഗലക്ഷണം കണ്ട് വിമാനത്താവളത്തില്‍നിന്നുതന്നെ ആശുപത്രിയിലേക്ക് മാറ്റിയവരാണ്. 70 കാരിയായ സ്ത്രീയെ മാര്‍ച്ച് 20നാണ് ഐസൊലേഷനില്‍ പ്രവേശിപ്പിച്ചത്.