ഫറോക്ക്: മോട്ടോര്‍ വാഹനവകുപ്പുമായി ബന്ധപ്പെട്ട കാര്യങ്ങള്‍ക്ക് മണിക്കൂറുകള്‍ ചെലവിട്ട് ചേവായൂരും സിവില്‍ സ്റ്റേഷനിലും കയറിയിറങ്ങേണ്ടി വരുന്ന ഫറോക്കിലെയും പരിസര പ്രദേശങ്ങളിലെയും ജനങ്ങള്‍ക്ക് ആശ്വാസമായി മന്ത്രിസഭാ തീരുമാനം. ഫറോക്ക് ആസ്ഥാനമായി പുതിയ ആര്‍.ടി.ഒ ഉപ കേന്ദ്രത്തിനുളള അനുമതിയാണ് കഴിഞ്ഞ മന്ത്രിസഭാ യോഗത്തില്‍ നല്‍കിയത്. സംസ്ഥാനത്തെ ആറ് ജില്ലകളില്‍ പുതുതായി ആര്‍.ടി.ഒ ഉപകേന്ദ്രങ്ങള്‍ അനുവദിച്ചിട്ടുണ്ട്.
ഇതില്‍ ജില്ലക്ക് ഫറോക്കിലാണ് സബ് ആര്‍.ടി ഓഫിസ്. ജോയിന്റ് ആര്‍.ടി.ഒ ഉള്‍പ്പെടെ ഏഴു തസ്തികകളും അനുവദിക്കാന്‍ മന്ത്രിസഭാ യോഗത്തില്‍ തീരുമാനമായിട്ടുണ്ട്. ഫറോക്കില്‍ ആര്‍.ടി ഓഫിസ് വരുന്നതോടെ ഫറോക്ക്, രാമനാട്ടുകര നഗരസഭകള്‍, കടലുണ്ടി പഞ്ചായത്ത്, കോര്‍പ്പറേഷനിലുള്‍പ്പെടുന്ന ചെറുവണ്ണൂര്‍ - നല്ലളം, ബേപ്പൂര്‍ മേഖലകള്‍ ഉള്‍പ്പെടുന്ന നിയോജക മണ്ഡലത്തിലുള്ളവര്‍ക്ക് മോട്ടോര്‍ വാഹന വകുപ്പുമായി ബന്ധപ്പെട്ട എല്ലാ കാര്യങ്ങള്‍ക്കും ഈ ഓഫിസിനെ ആശ്രയിക്കാം.