തലശ്ശേരി: മകള്‍ ഐശ്വര്യ കിഷോറിനെ കൊലപ്പെടുത്തിയ കേസില്‍ പിണറായി കൂട്ടക്കൊലക്കേസിലെ പ്രതി സൗമ്യയെ അറസ്റ്റുചെയ്തു. തലശ്ശേരി സി.ഐ കെ.ഇ പ്രേമചന്ദ്രനാണ് അറസ്റ്റ് രേഖപ്പെടുത്തിയത്. നേരത്തെ പിതാവ് കുഞ്ഞിക്കണ്ണനെയും മാതാവ് കമലയെയും കൊലപ്പെടുത്തിയ കേസിലാണ് സൗമ്യയെ അറസ്റ്റ് ചെയ്തിരുന്നത്.
എന്നാല്‍ മകള്‍ ഐശ്വര്യയെ വിഷം കൊടുത്താണ് കൊലപ്പെടുത്തിയതന്നെ് മൃതദേഹം കഴിഞ്ഞ ആഴ്ച പുറത്തെടുത്ത് പോസ്റ്റ്‌മോര്‍ട്ടം നടത്തിയപ്പോള്‍ കണ്ടെത്തിയിരുന്നു. സൗമ്യ കുറ്റസമ്മത മൊഴി നടത്തുകയും ചെയ്തിരുന്നു. തുടര്‍ന്ന് തലശ്ശേരി ജുഡീഷ്യല്‍ ഫസ്റ്റ് ക്ലാസ് മജിസട്രേട്ട് കോടതിയുടെ അനുമതിയോടെയാണ് സൗമ്യയെ അന്വേഷണ ഉദ്യോഗസ്ഥന്‍ സൗമ്യ റിമന്‍ഡില്‍ കഴിയുന്ന കണ്ണൂര്‍ സ്‌പെഷല്‍ സബ് ജയിലിലെത്തി അറസ്റ്റ് രേഖപ്പെടുത്തിയത്. ഈ കേസില്‍ സൗമ്യയെ കസ്റ്റഡിയില്‍ വാങ്ങി പൊലിസ് ചോദ്യം ചെയ്യും. ഇതിനുള്ള അപേക്ഷ ബുധനാഴ്ച നല്‍കും.
സൗമ്യയുടെ മൊബൈല്‍ ഫോണ്‍ വിശദമായി പരിശോധിച്ച് ഇവരുമായി ബന്ധമുള്ളവരുടെ മുഴുവന്‍ വിവരങ്ങളും പൊലിസ് അന്വേഷിക്കാനുള്ള നീക്കത്തിലാണ്. അതിനിടെ സൗമ്യയുടെ അവിഹിത ബന്ധത്തിന് സഹായം നല്‍കിയത് സംബന്ധിച്ച് പ്രത്യേക കേസ് രജിസ്റ്റര്‍ ചെയ്യാനും പൊലിസ് നീക്കം തുടങ്ങിയിട്ടുണ്ട്.