കുമ്പള: കര്‍ണാടകയില്‍ നിന്ന് അനധികൃതമായി അതിര്‍ത്തി വഴി കേരളത്തിലേക്കു മണല്‍ കടത്തുകയായിരുന്ന ലോറികള്‍ പിടികൂടി. രണ്ടുപേരെ പൊലിസ് അറസ്റ്റ് ചെയ്തു. പൊലിസിനെ വെട്ടിച്ച് രക്ഷപ്പെടാന്‍ ശ്രമിക്കുന്നതിനിടെ സാഹസികമായി പിന്തുടര്‍ന്നാണ് പൊലിസ് രണ്ടു ലോറികള്‍ പിടികൂടിയത്.
ഇന്നലെ രാവിലെ എട്ടു മണിയോടെ ബന്തിയോട് വച്ചായിരുന്നു സംഭവം. കുമ്പള സി.ഐ വി.വി മനോജ്, മഞ്ചേശ്വരം എസ്.ഐ അനൂബ് കുമാര്‍ എന്നിവരുടെ നേതൃത്വത്തിലാണു മണല്‍ കടത്തു സംഘത്തെ പിടികൂടിയത്. മണല്‍കടത്തിന് ഉപയോഗിച്ച ലോറികള്‍ കസ്റ്റഡിയിലെടുത്ത പൊലിസ് രണ്ടുപേരെ അറസ്റ്റ് ചെയ്തു.
കര്‍ണാടക പുത്തൂര്‍ സ്വദേശി ഉമര്‍ ഫാറൂഖ് (32), ബംട്ട്‌വാളിലെ മുഹമ്മദ് റഫീഖ് (27) എന്നിവരാണ് അറസ്റ്റിലായത്. വെള്ളിയാഴ്ച ദിവസങ്ങളില്‍ പൊലിസ് ആസ്ഥാനത്ത് ജില്ലാ പൊലിസ് മേധാവിയുടെ പരേഡ് നടക്കാറുണ്ട്. പരേഡില്‍ ഭൂരിഭാഗം ഉദ്യോഗസ്ഥരും പങ്കെടുക്കണമെന്നാണു നിയമം. ഈ സമയത്ത് വാഹന പരിശോധന നടക്കില്ലെന്ന ഉറപ്പിലാണു സംഘം മണല്‍കടത്തിനൊരുങ്ങിയത്. എന്നാല്‍ കര്‍ണാടകയില്‍ നിന്ന് അനധിക്യത മണലുമായി 17 ലോറികള്‍ പുറപ്പെട്ടിട്ടുണ്ടെന്ന രഹസ്യ വിവരം ജില്ലാ പൊലിസ് മേധാവിക്ക് ലഭിച്ചതിന്റെ അടിസ്ഥാനത്തില്‍ ഉപ്പള, മഞ്ചേശ്വരം എന്നിവിടങ്ങളില്‍ പൊലിസ് പരിശോധനക്കു സംവിധാനമൊരുക്കി.
അതിനിടെയാണ് ഊടുവഴിയിലൂടെ ഉപ്പളയിലെത്തിയ ലോറികള്‍ നിര്‍ത്താതെ ഓടിച്ചു പോയത്. പിന്തുടര്‍ന്ന പൊലിസ് സംഘം ബന്തിയോട് ദേശീയപാതയില്‍ വച്ചാണ് ലോറികള്‍ പിടികൂടിയത്.