ഡുനെഡിന്‍: ദക്ഷിണാഫ്രിക്കയും ന്യൂസിലന്‍ഡും തമ്മിലുള്ള ഒന്നാം ക്രിക്കറ്റ് ടെസ്റ്റ് ആവേശകരമാകുന്നു. ദക്ഷിണാഫ്രിക്കയുടെ ഒന്നാം ഇന്നിങ്‌സ് 308 റണ്‍സില്‍ അവസാനിപ്പിച്ച ന്യൂസിലന്‍ഡ് ഒന്നാം ഇന്നിങ്‌സില്‍ 341 റണ്‍സില്‍ പുറത്തായി. 33 റണ്‍സിന്റെ നേരിയ ലീഡ് സ്വന്തമാക്കാന്‍ കിവികള്‍ക്കു സാധിച്ചു. മൂന്നാം ദിനം കളി നിര്‍ത്തുമ്പോള്‍ രണ്ടാമിന്നിങ്‌സ് തുടങ്ങിയ ദക്ഷിണാഫ്രിക്ക ഒരു വിക്കറ്റ് നഷ്ടത്തില്‍ 38 റണ്‍സെടുത്തിട്ടുണ്ട്. ഒന്‍പതു വിക്കറ്റുകള്‍ കൈയിലിരിക്കേ ദക്ഷിണാഫ്രിക്കയ്ക്ക് അഞ്ചു റണ്‍സ് ലീഡ്. റണ്ണൊന്നുമെടുക്കാതെ സ്റ്റീഫന്‍ കുക്കാണു പുറത്തായത്. ഡീന്‍ എല്‍ഗാര്‍ 12 റണ്‍സുമായും ഹാഷിം അംല 23 റണ്‍സുമായും ക്രീസില്‍. വീണ ഏക വിക്കറ്റ് ട്രെന്‍ഡ് ബോള്‍ട്ട് സ്വന്തമാക്കി.
നേരത്തെ നായകന്‍ കെയ്ന്‍ വില്ല്യംസന്റെ 16ാം ടെസ്റ്റ് ശതകമാണു കിവികള്‍ക്ക് നിര്‍ണായക ലീഡ് സമ്മാനിച്ചത്. വില്ല്യംസന്‍ 130 റണ്‍സെടുത്തു. വാലറ്റത്ത് വാട്‌ലിങ് 50 റണ്‍സുമായി തിളങ്ങി. അഞ്ചു വിക്കറ്റുകള്‍ വീഴ്ത്തിയ സ്പിന്നര്‍ കേശവ് മഹാരാജിന്റെ ബൗളിങാണു കിവികളെ മികച്ച സ്‌കോര്‍ നേടുന്നതില്‍ തടഞ്ഞത്. ഫിലാന്‍ഡര്‍, മോണ്‍ മോര്‍കല്‍ എന്നിവര്‍ രണ്ടു വീതം വിക്കറ്റുകള്‍ വീഴ്ത്തി.