കാസര്‍കോട്: എസ്.കെ.എസ്.എസ്.എഫ് കാസര്‍കോട് ജില്ലാകമ്മറ്റി പുതിയ ബസ് സ്റ്റാന്‍ഡില്‍ സംഘടിപ്പിക്കുന്ന റമദാന്‍ പ്രഭാഷണത്തിനായി ഒരുങ്ങുന്നത് കൂറ്റന്‍ വേദി. ജില്ലയില്‍ വ്യാപകമായി സംഘടിപ്പിക്കുന്ന റമദാന്‍ ക്യംപയിന്റ ഭാഗമായി 24 മുതല്‍ 28 വരെ മര്‍ഹൂം കോയക്കുട്ടി ഉസ്താദ് നഗറില്‍ സംഘടിപ്പിക്കുന്ന ജില്ലാതല റമദാന്‍ പ്രഭാഷണത്തിന് പുതിയ ബസ് സ്റ്റാന്‍ഡ് പി.ബി ഗ്രൗണ്ടിലാണ് പടുകൂറ്റന്‍ വേദി ഒരുങ്ങുന്നത്.
ആയിരങ്ങള്‍ക്ക് ഇരിക്കാനുള്ള ഇരിപ്പിടമാണ് സംഘാടക സമിതി ഒരുക്കിയിരിക്കുന്നത്. 24നു ഉച്ചയ്ക്ക് രണ്ടിന് സിംസാറുല്‍ ഹഖ് ഹുദവിയുടെ പ്രഭാഷണത്തോടെ പ്രഭാഷണ പരമ്പരയ്ക്ക് തുടക്കമാവും. മറ്റു ദിവസങ്ങളില്‍ രാവിലെ ഒന്‍പതിനാണ് പരിപാടി. 25നു ഖലീല്‍ ഹുദവി കല്ലായം, 26നു അഡ്വ. ഓണമ്പിള്ളി മുഹമ്മദ് ഫൈസി, 27നു ഹാഫിള് നിസാമുദ്ധീന്‍ അസ്ഹരി കുമ്മനം, 28നു ബഷീര്‍ ഫൈസി ദേശമംഗലം എന്നിവര്‍ പ്രഭാഷണം നടത്തും.
റമദാന്‍ കാംപയിന്റ ഭാഗമായി ജില്ലയില്‍ വിവിധ പരിപാടികളാണ് ശാഖ, ക്ലസ്റ്റര്‍, മേഖലതലങ്ങളിലായി നടന്നുവരുന്നത്. ജില്ലയിലെ തെരഞ്ഞെടുക്കപ്പെട്ട കേന്ദ്രങ്ങളില്‍  ഖുര്‍ആന്‍ ടാലന്റ് ടെസ്റ്റ് നടക്കും. ഒരുദിനം ഒരു തിരുവചനം എന്ന ഹദീസ് പഠനം സാമൂഹ്യ മാധ്യമങ്ങള്‍വഴി നടത്തും. ക്ലസ്റ്റര്‍ തലങ്ങളില്‍ തസ്‌കിയത്ത് മീറ്റ്, ശാഖ തലങ്ങളില്‍ ഐ.എഫ്.സി ക്ലാസുകള്‍, മൗലിദ് സദസ്, ഇഅ്തികാഫ് ജല്‍സ, സഹചാരി ഫണ്ട്, മേഖലാ തലത്തില്‍ സാമ്പത്തിക സെമിനാര്‍, ജില്ലാതല സംവേദനങ്ങള്‍ വിവിധ പരിപാടികളാണ് ആവിഷ്‌കരിച്ചിട്ടുള്ളത്. റമദാന്‍ പ്രഭാഷണത്തിന്റെ വിജയത്തിനായി മുഴുവന്‍ ശാഖ ,ക്ലസ്റ്റര്‍ ,മേഖല, ഭാരവാഹികള്‍ സജീവമായി രംഗത്തിറങ്ങണമെന്ന് ജില്ലാ പ്രസിഡന്റ് താജുദ്ധീന്‍ ദാരിമി പടന്നയും ജനറല്‍ സെക്രട്ടറി ഹാരിസ് ദാരിമി ബെദിരയും അറിയിച്ചു.