കൊച്ചി: കൈക്കൂലിക്കേസില്‍ വിജിലന്‍സ് കോടതി രണ്ടു വര്‍ഷത്തെ തടവിനു ശിക്ഷിച്ച കെ.എസ്.ഇ.ബിയിലെ മസ്ദൂര്‍ ജീവനക്കാരന്‍ കണ്ണൂര്‍ പാറപ്പുറം സ്വദേശി ദാമോദരനെ ഹൈക്കോടതി വെറുതെ വിട്ടു.

കണ്ണൂരിലെ വെള്ളൂര്‍ കെ.എസ്.ഇ.ബി ഓഫിസില്‍ ജോലി ചെയ്യുന്ന സമയത്ത് 2003ല്‍ ഗാര്‍ഹിക വൈദ്യുതി കണക്ഷന്‍ നല്‍കാന്‍ 750 രൂപ കൈക്കൂലി വാങ്ങിയെന്ന കേസിലാണ് ദാമോദരനെ വിജിലന്‍സ് കോടതി ശിക്ഷിച്ചത്. രണ്ടു വര്‍ഷത്തെ തടവും മൂവായിരം രൂപ പിഴയുമായിരുന്നു ശിക്ഷ. ഇതിനെതിരേ ദാമോദരന്‍ നല്‍കിയ അപ്പീല്‍ ജസ്റ്റിസ് ബി. കെമാല്‍പാഷയാണ് പരിഗണിച്ചത്.

ഗാര്‍ഹിക കണക്ഷനു വേണ്ടി പോസ്റ്റുകള്‍ സ്ഥാപിക്കാന്‍ മൂന്നു ജോലിക്കാരെ ഏല്‍പ്പിച്ചുവെന്നും ഇതിനുള്ള കൂലിയായാണ് 750 രൂപ വാങ്ങിയതെന്നുമായിരുന്നു ദാമോദരന്റെ വാദം. ഈ വാദം അംഗീകരിച്ച സിംഗിള്‍ ബെഞ്ച്, കണക്ഷന്‍ നല്‍കുന്നതിന് പോസ്റ്റ് സ്ഥാപിക്കാന്‍ എത്തിയ തൊഴിലാളികള്‍ക്കു നല്‍കേണ്ട കൂലി ഇതുവരെ കെ.എസ്.ഇ.ബി ദാമോദരന് നല്‍കിയിട്ടില്ലെന്നു വിലയിരുത്തി. ഹരജിക്കാരന്‍ കൈക്കൂലി ചോദിച്ചതായി കുറ്റപത്രത്തില്‍ പറയുന്നില്ലെന്നും നിരീക്ഷിച്ചാണ് ഇയാളെ വെറുതെവിട്ടത്.