കോഴിക്കോട്: ബ്ലൂ ഫ്‌ളാഗ് സര്‍ട്ടിഫിക്കേഷന് വേണ്ടി കേരളത്തില്‍ നിന്ന് തെരഞ്ഞെടുക്കപ്പെട്ട ഏക ബീച്ചായി കാപ്പാട് ബീച്ച് ലോകശ്രദ്ധയാകര്‍ഷിക്കുകയാണ്. ആഗോളബീച്ച് സര്‍ട്ടിഫിക്കേഷന്‍ സംഘടനയായ ഫൗണ്ടേഷന്‍ ഫോര്‍ എന്‍വയണ്‍മെന്റല്‍ എജ്യുക്കേഷനാണ് ബ്ലൂ ഫ്‌ളാഗ് സര്‍ട്ടിഫിക്കേഷന്‍ നല്‍കുന്നത്. കാപ്പാട് ബീച്ചിലെ ഏരൂര്‍ പ്രദേശം എം.എല്‍.എ കെ. ദാസന്‍, ജില്ലാ കലക്ടര്‍ യു.വി ജോസ്, ചേമഞ്ചേരി പഞ്ചായത്ത് പ്രസിഡന്റ് അശോകന്‍ കോട്ട്, ഡി.ടി.പി.സി സെക്രട്ടറി, വിവിധ വകുപ്പ് ഉദ്യോഗസ്ഥര്‍ സന്ദര്‍ശിച്ചു. പ്രദേശത്ത് സര്‍ട്ടിഫിക്കേഷന്റെ ഭാഗമായി നടപ്പില്‍ വരുത്തേണ്ട പദ്ധതികളെ കുറിച്ച് ചര്‍ച്ച നടത്തി.
പദ്ധതി നടപ്പില്‍ വരുത്തുന്നതിനായി ബീച്ച് മാനേജ്‌മെന്റ് കമ്മിറ്റി രൂപീകരിച്ചു. ജില്ലാ കലക്ടറാണ് ബ്ലൂ ഫ്‌ളാഗ് സര്‍ട്ടിഫിക്കേഷന്റെ നോഡല്‍ ഓഫിസര്‍. രാജ്യാന്തര നിലവാരം വികസിപ്പിക്കുന്നതിനു വേണ്ടി കേന്ദ്ര പരിസ്ഥിതി, വനം മന്ത്രാലയം കേരളത്തില്‍ നിന്നും തിരഞ്ഞെടുത്തതും കാപ്പാട് ബീച്ചാണ്.