നെടുങ്കണ്ടം: മുഖ്യമന്ത്രിയുടെ ദുരിതാശ്വാസനിധിയില്‍ നിന്നും ഉടുമ്പന്‍ചോല താലൂക്കിലെ അപേക്ഷകര്‍ക്ക് മന്ത്രി എം.എം.മണി ധനസഹായം വിതരണം ചെയ്തു. ഉടുമ്പന്‍ചോല താലൂക്കോഫിസില്‍ നടന്ന ചടങ്ങിലാണ് റവന്യു ഉദ്യോഗസ്ഥരുടെ സാന്നിധ്യത്തില്‍ ചെക്കുകള്‍ വിതരണം ചെയ്തത്.
വാഹനാപകടത്തില്‍ മകന്‍ മരിച്ച കത്തിപ്പാറ അഴകനാകുന്നേല്‍ ഗ്രേസി മാത്യു, വാഹനാപകടത്തില്‍ ഭര്‍ത്താവ് മരിച്ച കല്ലാര്‍ ചാര്യവിളപുത്തന്‍വീട്ടില്‍ സുഷമ സുരേന്ദ്രന്‍, അപകടത്തില്‍ ഭാര്യ മരിച്ച പൊട്ടന്‍കാട് പനച്ചിക്കല്‍ ഷാജി.പി.സി എന്നിവര്‍ക്ക് മുഖ്യമന്ത്രിയുടെ ദുരിതാശ്വാസനിധിയില്‍ നിന്നുള്ള ഓരോ ലക്ഷം രൂപ വീതമാണ് വിതരണം ചെയ്തത്.
കഴിഞ്ഞ ആഴ്ച ഇടിമിന്നലില്‍ വീട് പൂര്‍ണമായി തകരുകയും രണ്ടു വയസ്സുകാരിയടക്കം മൂന്ന് പേര്‍ക്ക് പരിക്കേല്‍ക്കുകയും ചെയ്ത സംഭവത്തില്‍ പുഷ്പക്കണ്ടം ശൂലപ്പാറ പുലക്കുടിയില്‍ വത്സമ്മയുടെ കുടുംബത്തിന് അടിയന്തര സഹായമായി പ്രകൃതിക്ഷോപ ദുരിതാശ്വാസനിധിയില്‍ നിന്നും ഒരു ലക്ഷം രൂപ അനുവദിച്ചിരുന്നു.ഇതിന്റെ ഒന്നാം ഗഡുവായ 40,000 രൂപയും ചടങ്ങില്‍ വത്സമ്മക്ക് കൈമാറി.
കൂടാതെ ഏലത്തോട്ടത്തില്‍ പണിക്കിടയില്‍ മരം വീണു മരിച്ച ബൈസന്‍വാലി പനച്ചിക്കല്‍ വീച്ചില്‍ മേഴ്‌സി, ചിറ്റേടത്ത് കുന്നേല്‍ പുഷ്പ, നെല്ലിക്കാട് ഭാഗത്ത് പാണ്ടിയമ്മ, കുത്തുങ്കല്‍ വട്ടക്കുന്നേല്‍ ചിന്നമ്മ എന്നിവരുടെ കുടുംബത്തിന് ദുരിതാശ്വാസനിധിയില്‍ നിന്ന് നാല് ലക്ഷം രൂപ വീതം അനുവദിച്ചതായും,ഉടന്‍തന്നെ അത് വിരണം ചെയ്യുമെന്നും മന്ത്രി അറിയിച്ചു.
ചടങ്ങില്‍ ഉടുമ്പന്‍ചോല തഹസില്‍ദാര്‍ പി.എസ്.ഭാനുകുമാര്‍,അഡീഷണല്‍ തഹസില്‍ദാര്‍ എം.കെ.ഷാജി, എന്‍.കെ.ഗോപിനാഥന്‍, പി.എം.എം.ബഷീര്‍, എം.സുകുമാരന്‍,പി.ആര്‍.ബാബു,ഒ.കെ.അനില്‍കുമാര്‍ എന്നിവര്‍ പങ്കെടുത്തു.