തിരുവനന്തപുരം: അനില്‍ ആന്റണി പത്തനംതിട്ടയില്‍ തോല്‍ക്കണമെന്ന് കോണ്‍ഗ്രസ് നേതാവ് എ.കെ ആന്റണി. കോണ്‍ഗ്രസ് നേതാക്കളുടെ മക്കള്‍ ബി.ജെ.പിയില്‍ ചേരുന്നത് തെറ്റാണെന്നും അദ്ദേഹം കൂട്ടിച്ചേര്‍ത്തു.  വാര്‍ത്താ സമ്മേളനത്തിലാണ് അദ്ദേഹത്തിന്റെ പ്രതികരണം. 

 'കുടുംബം വേറെ, രാഷ്ട്രീയം വേറെ എന്നതാണ് എന്റെ നിലപാട്. ഇത് കെ.എസ്.യു കാലം മുതലുള്ള നിലപാടാണ്. മക്കളെക്കുറിച്ച് എന്നെക്കൊണ്ട് അധികം പറയിക്കണ്ട. ആ ഭാഷ താന്‍ ശീലിച്ചിട്ടില്ല.അത് എന്റെ സംസ്‌കാരമല്ല'. - അദ്ദേഹം പറഞ്ഞു.

താന്‍ പ്രചാരണത്തിന് പോകാതെ തന്നെ പത്തനംതിട്ടയില്‍ അനില്‍ തോല്‍ക്കുമെന്നും യു.ഡി.എഫ് സ്ഥാനാര്‍ഥി ജയിക്കുമെന്നും അദ്ദേഹം ആവര്‍ത്തിച്ചു. ആന്റണിയുടെ മകന്‍ അനില്‍ ആന്റണിയാണ് പത്തനംതിട്ടയിലെ എന്‍.ഡി.എ സ്ഥാനാര്‍ഥി.

'പൗരത്വ നിയമത്തില്‍ മുഖ്യമന്ത്രി പിണറായി വിജയനും അദ്ദേഹം മറുപടി നല്‍കി. 'ഭരണഘടന ഉണ്ടാക്കുന്നതിനെ അട്ടിമറിക്കാന്‍ ശ്രമിച്ചവരാണ് സി.പി.എമ്മിന്റെ പൂര്‍വികരെന്നും പിണറായിക്ക് കോണ്‍ഗ്രസിനെ അധിക്ഷേപിക്കാന്‍ ഒരാവകാശവുമില്ലെന്നും ആന്റണി പറഞ്ഞു. അരിയാഹാരം കഴിക്കുന്ന കേരളീയര്‍ നിങ്ങളെ നിരാകരിക്കും'.ഇന്ത്യയില്‍ ജീവിക്കുന്ന എല്ലാ പൗരന്മാര്‍ക്കും തുല്യത വേണമെന്നും ഇത് 'ഡു ഓര്‍ ഡൈ' തെരഞ്ഞെടുപ്പാണെന്നും ആന്റണി പറഞ്ഞു.

'ഭരണഘടന ഉണ്ടാക്കിയതില്‍ സി.പി.എമ്മിന് ഒരു പങ്കുമില്ല. മുഖ്യമന്ത്രി പിണറായി വിജയാ, അങ്ങയുടെ പാര്‍ട്ടിക്ക് ഭരണഘടന ഉണ്ടാക്കിയതില്‍ ഒരു പങ്കുമില്ല.ഭരണഘടന ഉണ്ടാക്കിയതിന്റെ അവകാശം കോണ്‍ഗ്രസിനും അംബേദ്കര്‍ക്കും മാത്രമാണ്. നെഹ്‌റു സര്‍ക്കാരിനെ അട്ടിമറിക്കാന്‍ ശ്രമിച്ചവരാണ് പിണറായിയുടെ പാര്‍ട്ടി. ആരോഗ്യനില അനുകൂലമല്ലെങ്കിലും ഈ തെരഞ്ഞെടുപ്പില്‍ തന്റെ പങ്ക് വഹിക്കും'. എ.കെ ആന്റണി കൂട്ടിച്ചേര്‍ത്തു.