ജയ്പൂര്‍: നിര്‍ണായക പോരാട്ടത്തില്‍ 15 റണ്‍സിന് കിങ്‌സ് ഇലവന്‍ പഞ്ചാബിനെ വീഴ്ത്തി രാജസ്ഥാന്‍ റോയല്‍സ് ഐ.പി.എല്ലിലെ പ്ലേയോഫ് പ്രതീക്ഷ കാത്തു. സ്വന്തം തട്ടകത്തില്‍ പഞ്ചാബിനെ നേരിടാനിറങ്ങിയ രാജസ്ഥാന്‍ നിശ്ചിത 20 ഓവറില്‍ എട്ട് വിക്കറ്റ് നഷ്ടത്തില്‍ 158 റണ്‍സെടുത്തപ്പോള്‍ പഞ്ചാബിന്റെ പോരാട്ടം 20 ഓവറില്‍ ഏഴ് വിക്കറ്റ് നഷ്ടത്തില്‍ 143 റണ്‍സില്‍ അവസാനിച്ചു. 

മികച്ച ബൗളിങും ഫീല്‍ഡിങുമായി രാജസ്ഥാന്‍ താരങ്ങള്‍ കളം നിറഞ്ഞപ്പോള്‍ പഞ്ചാബ് താരങ്ങള്‍ ഒന്നൊന്നായി കൂടാരം കയറി. ഓപണര്‍ കെ.എല്‍ രാഹുല്‍ ഒറ്റയാള്‍ പോരാട്ടത്തിലൂടെ വിജയത്തിലെത്തിക്കാന്‍ കിണഞ്ഞു ശ്രമിച്ചെങ്കിലും പിന്തുണയ്ക്കാന്‍ ആളില്ലാതെ പോയി. രാഹുല്‍ 70 പന്തില്‍ പതിനൊന്ന് ഫോറും രണ്ട് സിക്‌സും സഹിതം 95 റണ്‍സെടുത്ത് പുറത്താകാതെ നിന്നു. ടോസ് നേടി ബാറ്റിങ് തിരഞ്ഞെടുത്ത രാജസ്ഥാന് കൃത്യമായ ഇടവേളകളില്‍ വിക്കറ്റുകള്‍ നഷ്ടമായി. ഇംഗ്ലീഷ് ഓപണര്‍ ജോസ് ബട്‌ലര്‍ മികച്ച ബാറ്റിങുമായി വീണ്ടും രക്ഷകനായി ഒരറ്റം കാത്തതാണ് അവര്‍ക്ക് തുണയായത്. മലയാളി താരം സഞ്ജു സാംസണ്‍ ഇംഗ്ലീഷ് താരത്തെ പിന്തുണച്ചു. മറ്റൊരാളും മികവ് പുലര്‍ത്തിയില്ല. ബട്‌ലര്‍ 58 പന്തുകള്‍ നേരിട്ട് ഒന്‍പത് ഫോറും ഒരു സിക്‌സും സഹിതം 82 റണ്‍സെടുത്തു. സഞ്ജു 18 പന്തില്‍ 22 റണ്‍സ് കണ്ടെത്തി. നാലോവറില്‍ 34 റണ്‍സ് വഴങ്ങി ആന്‍ഡ്രു ടൈ നാല് വിക്കറ്റുകള്‍ വീഴ്ത്തി.