ഫറോക്ക്: മാലിന്യം കലര്‍ന്നു കറുത്ത ജലം ഒഴുകിയ ചാലിയാറിന്റെ കൈവഴിയായ കൊളത്തറ ചെറുപുഴ ജില്ലാ കലക്ടര്‍ യു.വി ജോസ് സന്ദര്‍ശിച്ചു.
പുഴയില്‍ മാലിന്യം കലര്‍ന്നിട്ടുണ്ടെങ്കില്‍ പരിശോധിച്ച് മാലിന്യം ഒഴുക്കുന്നവര്‍ക്കെതിരേ കര്‍ശന നടപടി സ്വീകരിക്കുമെന്നും കലക്ടര്‍ പറഞ്ഞു. കഴിഞ്ഞ ഏതാനും ദിവസങ്ങള്‍ക്ക് മുന്‍പാണ് പുഴയിലെ വെള്ളത്തിന് കറുത്ത നിറം കാണപ്പെട്ടത്. വെള്ളത്തിന് കടുത്ത ദുര്‍ഗന്ധവുമുണ്ടായിരുന്നു.
ദിവസങ്ങള്‍ക്ക് മുന്‍പ് ചെറുപുഴയിലെ ജലം ചുവപ്പ് കലര്‍ന്ന തവിട്ട് നിറമായതിനെ തുടര്‍ന്നു ആരോഗ്യവകുപ്പ് അധികൃതര്‍ പരിശോധന നടത്തിയിരുന്നു.
കഴിഞ്ഞ വര്‍ഷവും ഇതേ സമയം പുഴയില്‍ ദുര്‍ഗന്ധം വമിയ്ക്കുന്ന കറുത്ത ജലം നിറഞ്ഞ് മത്സ്യങ്ങള്‍ കൂട്ടത്തോടെ ചത്ത് പൊന്തിയിരുന്നു. റഹിമാന്‍ ബസാര്‍, കൊളത്തറ, തൊണ്ടിലക്കടവ് മേഖയിലെ പുഴയോര നിവാസികള്‍ വെള്ളത്തിന് ഇടയ്ക്കിടെ ഉണ്ടാകുന്ന നിറം മാറ്റത്തില്‍ ആശങ്കയിലാണ്. പ്രദേശത്തെ കിണറുകളിലേക്ക് പുഴയിലെ കറുത്ത വെള്ളം കലരുമോയെന്ന ഭീതിയും നാട്ടുകാര്‍ക്കുണ്ട്.
പുഴയുടെ വെളളത്തിന്റെ നിറം മാറുമ്പോള്‍ പരിശോധന നടത്തുന്നതല്ലാതെ യഥാര്‍ഥ കാരണം കണ്ടെത്താന്‍ അധികൃതര്‍ക്കായിട്ടില്ലെന്നും നാട്ടുകാര്‍ കുറ്റപ്പെടുത്തുന്നു. ജനങ്ങളുടെ പരാതിയെ തുടര്‍ന്നാണ് കലക്ടറുടെ സന്ദര്‍ശനം. വി.കെ.സി മമ്മദ്‌കോയ എം.എല്‍.എയും കലക്ടര്‍ക്കൊപ്പമുണ്ടായിരുന്നു.