പാറശാല: പ്രസവത്തിനിടെ അമ്മയും കുഞ്ഞും മരിച്ചത്, ചികിത്സാ പിഴവാണെന്നാരോപിച്ച്  നാട്ടുകാരും ബന്ധുക്കളും മൃതദേഹങ്ങളുമായി ആശുപത്രി ഉപരോധിച്ചു.പാറശാല സര്‍ക്കാര്‍ ആശുപത്രിയിലാണ് സംഭവം.
 പാറശാല കുളപ്പുറം ഒറ്റപ്പനവിള വീട്ടില്‍ സജിതയും (32) കുഞ്ഞുമാണ് മരിച്ചത്. പാറശാല ആശുപത്രിയില്‍ ചികിത്സയിലായിരുന്ന സജിതയ്ക്ക് 20-ാം തീയതിയാണ് പ്രസവ ദിവസമായി ഡോക്ടര്‍ പറഞ്ഞിരുന്നത്. എന്നാല്‍ ശാരീരിക ബുദ്ധിമുട്ട് അനുഭവപ്പെട്ടതിനെ തുടര്‍ന്ന് ബുധനാഴ്ച രാവിലെ തന്നെ ആശുപത്രിയിലെത്തിച്ചു.  ഉച്ചയോടെ  ആരോഗ്യ നില വഷളായതിനെ തുടര്‍ന്ന്  തിരുവനന്തപുരം എസ്.എ.ടിയിലേയ്ക്ക് കൊണ്ടു പോകാന്‍ ആശുപത്രി അധികൃതര്‍ നിര്‍ദേശിച്ചു. ഉടന്‍തന്നെ യുവതിയെ എസ്.എ.ടിയില്‍ എത്തിച്ചെങ്കിലും പ്രസവത്തെത്തുടര്‍ന്ന് കുഞ്ഞും  മണിക്കൂറുകള്‍ക്കുള്ളില്‍ യുവതിയും മരിച്ചു. ഇതേ തുടര്‍ന്ന് യുവതിയുടെ ബന്ധുക്കള്‍ പാറശാല ആശുപത്രിയിലെ ഡോക്ടര്‍ക്കെതിരെ പാറശാല പൊലിസില്‍ പരാതി നല്‍കി.ഉച്ചക്ക് മൂന്നു മണിയോടെ  യുവതിയുടെ നാട്ടുകാരും ബന്ധുക്കളും പ്രതിഷേധവുമായി പാറശാല ആശുപത്രിയിലെത്തി.
സംഘര്‍ഷഭരിതമായ അന്തരീക്ഷത്തില്‍ വൈകിട്ട് 6.45 ഓടെ യുവതിയുടെയും കുഞ്ഞിന്റെയും മൃതദേഹങ്ങളുമായി ആശുപത്രിയും സൂപ്രണ്ട് ഓഫിസും ഉപരോധിച്ചു.
ഇതിനു പിന്നാലെ കോണ്‍ഗ്രസ് പാര്‍ട്ടിയുടെ നേതൃത്വത്തില്‍ മണിക്കൂറുകളോളം ദേശീയ പാത ഉപരോധിച്ചു. ഇതേ തുടര്‍ന്ന്  പാറശാല-കളിയിക്കാവിള ദേശീയപാതയിലെ ഗതാഗതം  താറുമാറായി. ആശുപത്രിയിലെ പ്രവര്‍ത്തനങ്ങള്‍ തടസപ്പെട്ടതിനെ തുടര്‍ന്ന് ചികിത്സയിലായിരുന്ന ഗര്‍ഭിണികളെ വിവിധ ആശുപത്രികളിലേയ്ക്ക് പറഞ്ഞയച്ചു.
നെയ്യാറ്റിന്‍കര ഡി.വൈ.എസ്.പി ഹരികുമാറിന്റെ നേതൃത്വത്തില്‍ വന്‍ പൊലിസ് സംഘം സ്ഥലത്ത് ക്യാംപ് ചെയ്യുന്നുണ്ട്.