താഷ്‌ക്കന്റ് (ഉസ്‌ബെക്കിസ്ഥാന്‍): ഷാങ്ഹായ് കോര്‍പറേഷന്‍ ഓര്‍ഗനൈസേഷന്‍ (എസ്.സി.ഒ) ഉച്ചകോടിയില്‍ പങ്കെടുക്കുന്നതിന് ഉസ്‌ബെക്കിസ്ഥാന്‍  തലസ്ഥാനമായ താഷ്‌ക്കന്റിലെത്തിയ പ്രധാനമന്ത്രി നരേന്ദ്രമോദി റഷ്യന്‍ പ്രസിഡന്റ് വ്‌ളാദ്മിര്‍ പുടിനുമായി കൂടിക്കാഴ്ച നടത്തി. ആണവോര്‍ജ മേഖലയിലും ഹൈഡ്രോകാര്‍ബണ്‍ മേഖലയിലും പരസ്പരം സഹകരിക്കുന്നതിന് ഇരുനേതാക്കളും ചര്‍ച്ചചെയ്തു. ഇതടക്കം വിവിധ വിഷയങ്ങള്‍ ചര്‍ച്ച ചെയ്തതായി വിദേശകാര്യ മന്ത്രാലയ വക്താവ് വികാസ് സ്വരൂപ് അറിയിച്ചു.

എസ്.സി.ഒ അംഗരാജ്യങ്ങളുമായി ഇന്ത്യയ്ക്കു സാമ്പത്തിക സഹകരണം ഉറപ്പാക്കാനാകുമെന്ന പ്രതീക്ഷയോടെയാണ് ഉച്ചകോടിയില്‍ പ്രധാനമന്ത്രി പങ്കെടുക്കുന്നത്. എസ്.സി.ഒയില്‍ ഇന്ത്യ അംഗമായുള്ള കരാറില്‍ പ്രധാനമന്ത്രി ഒപ്പുവച്ചു. ഇന്ത്യയുടെ എസ്.സി.ഒ അംഗത്വം മേഖലയിലെ സുരക്ഷിതത്വം കൂട്ടുമെന്ന് പ്രധാനമന്ത്രി പറഞ്ഞു.

ഇന്ത്യയും മധ്യേഷ്യന്‍ രാജ്യങ്ങളുമായുള്ള സാമ്പത്തിക സഹകരണവും രാജ്യാന്തര ബന്ധവും മെച്ചപ്പെടുന്നതിന് ഉച്ചകോടി സഹായകമാകുമെന്നും പ്രധാനമന്ത്രി അറിയിച്ചിരുന്നു.