തിരുവനന്തപുരം: ദേവസ്വം റിക്രൂട്ട്‌മെന്റ് ബോര്‍ഡ് പിരിച്ചുവിട്ട് നിയമനങ്ങള്‍ പി.എസ്.സിക്ക് വിടാനുള്ള നീക്കം ഉപേക്ഷിക്കണമെന്ന് എന്‍.എസ്.എസ്. 102ാമത് ബജറ്റ് സമ്മേളനത്തോടനുബന്ധിച്ച് നടന്ന സമ്മേളനത്തില്‍ അവതരിപ്പിച്ച പ്രമേയത്തിലാണ് ഈ ആവശ്യം ഉന്നയിച്ചത്.

ശബരിമല ക്ഷേത്രത്തിന്റെ പ്രത്യേകത കണക്കിലെടുത്ത് നിലവിലുള്ള ആചാരാനുഷ്ഠാനങ്ങള്‍
സംരക്ഷിക്കപ്പെടുന്നതിന് സര്‍ക്കാര്‍ ഭാഗത്തുനിന്നും നടപടിയുണ്ടാവണം. തെരഞ്ഞെടുപ്പില്‍ ജനം വിധിയെഴുതിയത് വര്‍ഗീയതക്കെതിരെയുള്ള നിലപാടിന് അനുകൂലമാണ്. വര്‍ഗീയതക്കെതിരെയുള്ള കാര്യത്തില്‍ വലതുപക്ഷം സ്വീകരിച്ച നിലപാടാണ് അവര്‍ക്ക് വിനയായത്. കഴിഞ്ഞ സര്‍ക്കാരിന്റെ കാലത്ത് ഒട്ടേറെ കാര്യങ്ങള്‍ നേടിയെടുക്കാനായെങ്കിലും പല പ്രശ്‌നങ്ങളും പരിഹരിക്കാന്‍ കഴിയാഞ്ഞത് ഉദ്യോഗസ്ഥ മേധാവിത്വം മൂലമാണ്. പുതിയ സര്‍ക്കാരിന്റെ സമീപനങ്ങള്‍ അറിഞ്ഞിട്ട് ഭാവി പരിപാടികള്‍ തീരുമാനിക്കുമെന്നും എന്‍.എസ്.എസ് ജനറല്‍ സെക്രട്ടറി ജി. സുകുമാരന്‍ നായര്‍ വ്യക്തമാക്കി.