ബാര്‍ബഡോസ്: ദക്ഷിണാഫ്രിക്കയ്‌ക്കെതിരായ വമ്പന്‍ ജയത്തോടെ വെസ്റ്റിന്‍ഡീസ് ത്രിരാഷ്ട്ര പരമ്പരയുടെ ഫൈനലില്‍ കടന്നു. 100 റണ്‍സിനാണ് ദക്ഷിണാഫ്രിക്കയെ വിന്‍ഡീസ് വീഴ്ത്തിയത്. കലാശപ്പോരില്‍ ആസ്‌ത്രേലിയയാണ് വിന്‍ഡീസിന് എതിരാളി.

വിന്‍ഡീസ് ഉയര്‍ത്തിയ 286 റണ്‍സ് വിജയലക്ഷ്യം പിന്തുടര്‍ന്ന ദക്ഷിണാഫ്രിക്ക 185 റണ്‍സിന് പുറത്താവുകയായിരുന്നു. വമ്പന്‍ താരങ്ങളായ ഹാഷിം അംല(16) ക്വിന്‍ണ്‍ ഡി കോക്ക്(6) ഡുപ്ലെസിസ്(3) എ.ബി ഡിവില്ല്യേഴ്‌സ്(2) ജെ.പി ഡുമിനി(5) ക്രിസ് മോറിസ്(7) എന്നിവര്‍ തീര്‍ത്തും നിരാശപ്പെടുത്തി. ബെഹര്‍ദീന്‍(35) മോണി മോര്‍ക്കല്‍(32*) ഇമ്രാന്‍ താഹിര്‍(29) എന്നിവരുടെ ബാറ്റിങാണ് ദക്ഷിണാഫ്രിക്കയെ നാണക്കേടില്‍ നിന്ന് രക്ഷിച്ചത്.
ഒരു ഘട്ടത്തില്‍ ആറു 65 നിലയിലായിരുന്നു ടീം. മൂന്നു വിക്കറ്റ് വീതം വീഴ്ത്തിയ സുനില്‍ നരെയ്ന്‍, ഷാനോന്‍ ഗബ്രിയേല്‍ എന്നിവരാണ് വിന്‍ഡീസ് നിരയില്‍ തിളങ്ങിയത്.
നേരത്തെ ടോസ് നേടിയ ദക്ഷിണാഫ്രിക്ക വിന്‍ഡീസിനെ ബാറ്റിങിനയക്കുകയായിരുന്നു. എന്നാല്‍ വിന്‍ഡീസിന്റെ തുടക്കം പാളി. ജോണ്‍സന്‍ ചാള്‍സ്(4) ആന്ദ്രെ ഫ്‌ളെച്ചര്‍(8) മര്‍ലോണ്‍ സാമുവല്‍സ്(0) ദിനേഷ് രാംദിന്‍(0) എന്നിവര്‍ പെട്ടെന്ന് പുറത്തായി.
ഡ്വെയ്ന്‍ ബ്രാവോ(102)യുടെ ഇന്നിങ്‌സാണ് വിന്‍ഡീസിനെ മികച്ച സ്‌കോറിലേക്ക് നയിച്ചത്. കരണ്‍ പൊള്ളാര്‍ഡ്(62) ജേസന്‍ ഹോള്‍ഡര്‍(40) കാര്‍ലോസ് ബ്രാത്ത്‌വൈറ്റ്(33*) എന്നിവര്‍ പിന്തുണ നല്‍കി. 103 പന്തില്‍ 12 ബൗണ്ടറിയും നാലു സിക്‌സറും അടങ്ങുന്നതാണ് ബ്രാവോയുടെ ഇന്നിങ്‌സ്.
ദക്ഷിണാഫ്രിക്കയ്ക്ക് വേണ്ടി കഗിസോ റബാദയും ക്രിസ് മോറിസും മൂന്നുവിക്കറ്റ് വീഴ്ത്തി.