കൊട്ടിയം: പതിനാറുകാരിയെ പട്ടാപ്പകല്‍ വീടുകയറി പീഡിപ്പിച്ച സംഭവവുമായി ബന്ധപ്പെട്ടു സ്വകാര്യബസ് ജീവനക്കാരനായ യുവാവിനെ കൊട്ടിയം പൊലിസ് അറസ്റ്റ് ചെയ്തു. തഴുത്തല പുഞ്ചിരിച്ചിറ കോളനി സ്വദേശിയായ സുനിലാണ് (30)പിടിയിലായത്. പ്രതി വിവാഹിതനാണ്. കഴിഞ്ഞ ദിവസം ഉച്ചയോടെയായിരുന്നു സംഭവം. അമ്മയുടെ കുടുംബ വീട്ടിലെത്തിയ പ്ലസ്‌വണ്‍ വിദ്യാര്‍ഥിയാണ് പീഡനത്തിനിരയായത്. പെണ്‍കുട്ടിയോട് പ്രതി നിരന്തരമായി പ്രണയാഭ്യര്‍ഥന നടത്തിയിരുന്നു. സംഭവ ദിവസം ഇയാള്‍ ഈ വീട്ടിലെത്തി വീണ്ടും ആവശ്യം ഉന്നയിച്ചു. ഇതും പെണ്‍കുട്ടി എതിര്‍ത്തിരുന്നു. ഇതില്‍ പ്രകോപിതനായ പ്രതി പെണ്‍കുട്ടിയെ പീഡിപ്പിക്കുകയായിരുന്നു.
ഈസമയം വീട്ടില്‍ എഴുപത്തഞ്ചുകാരിയായ അമ്മുമ്മ മാത്രമേ ഉണ്ടായിരുന്നുള്ളു. അമ്മുമ്മയോടും വൈകിട്ട് വീട്ടിലേക്കു കൂട്ടികൊണ്ടുപോയ അമ്മയോടും പെണ്‍കുട്ടി വിവരം ധരിപ്പിച്ചില്ല. എന്നാല്‍ രാത്രിയോടെ തന്റെ സുഹൃത്തിനെ ഫോണില്‍ വിളിച്ചു കാര്യങ്ങള്‍ പറയുകയും ഇനി ജീവിച്ചിരിക്കില്ല എന്ന് പറയുകയും ചെയ്തിരുന്നു. ഇയാള്‍ നല്‍കിയ വിവരത്തെ തുടര്‍ന്ന് പഞ്ചായത്തു മെമ്പര്‍ രാത്രിതന്നെ സ്‌റ്റേഷനിലെത്തി സംഭവം ധരിപ്പിച്ചു. പൊലിസ് ഉടന്‍തന്നെ പെണ്‍കുട്ടിയുടെ വീട്ടിലെത്തി കാര്യങ്ങള്‍ തിരക്കുമ്പോഴാണ് അമ്മയും വിവരങ്ങള്‍ അറിയുന്നത്. തുടര്‍ന്ന് പൊലിസ് ഇരുവരെയും കൊല്ലത്തെ മഹിളാമന്ദിരത്തില്‍ എത്തിച്ചു. പെണ്‍കുട്ടിയുടെ മൊഴിയുടെ അടിസ്ഥാനത്തില്‍ ചാത്തന്നൂര്‍ സി.ഐ അജയ്‌നാഥ് കൊട്ടിയം എസ്.ഐ ആര്‍.രതീഷ്, ജൂനിയര്‍ എസ്.ഐ സഞ്ജു എന്നിവരടങ്ങിയ സംഘമാണ് പ്രതിയെ അറസ്റ്റു ചെയ്തത്.