ന്യൂഡല്‍ഹി: മുഖ്യമന്ത്രിയുടെ അഭിമുഖത്തിലെ മലപ്പുറം സംബന്ധിച്ച വിദ്വേഷ പരാമര്‍ശത്തില്‍ ന്യായീകരണവുമായി സി.പി.എം കേന്ദ്ര കമ്മിറ്റി അംഗം എ.കെ ബാലന്‍. മുഖ്യമന്ത്രിയുടെ പരാമര്‍ശത്തെ വക്രീകരിച്ചുള്ള പ്രചരണമാണ് നടക്കുന്നത്. ദ ഹിന്ദു പത്രത്തില്‍ പ്രസിദ്ധീകരിച്ച അഭീമുഖം ഒന്നു കൂടി വായിക്കണമെന്നുമാണ് എ.കെ ബാലന്‍ പറയുന്നത്. 

മലപ്പുറം ജില്ലയെ മുന്‍നിര്‍ത്തി വൃത്തികെട്ട പ്രചരണമാണ് നടക്കുന്നതെന്നും ഒരു പ്രത്യേക വിഭാഗത്തിന്റെ വിശ്വാസ്യതയെ ദുരുപയോഗിച്ചെന്നും ബാലന്‍ മാധ്യമങ്ങളോട് പറഞ്ഞു.

ദ ഹിന്ദു പത്രത്തില്‍ പ്രസിദ്ധീകരിച്ച അഭീമുഖം ഒന്നു കൂടി വായിക്കണം.  സംഘപരിവാറിന് എതിരെ രൂക്ഷമായ നിലപാട് അതില്‍ പറയുന്നുണ്ട്- അദ്ദേഹം പറഞ്ഞു. സംഘപരിവാറിനോട് ഒത്ത് തീര്‍പ്പില്ലെന്ന് മുഖ്യമന്ത്രി അഭിമുഖത്തില്‍ പറഞ്ഞിട്ടുണ്ട്. കരിപ്പൂരില്‍ നിന്ന് സ്വര്‍ണം പിടിച്ചാല്‍ പിന്നെ മലപ്പുറം എന്നല്ലേ പറയേണ്ടതെനന്നും ബാലന്‍ ചോദിക്കുന്നു. തിരുവനന്തപുരത്ത് നിന്ന് സ്വര്‍ണം പിടിച്ചെന്ന് പറഞ്ഞാല്‍ തിരുവനന്തപുരത്തെ അപമാനിക്കലാണോ സ്വര്‍ണം മുഴുവന്‍ കമലയും വീണയും കൊണ്ട് പോയന്നല്ലേ ബി.ജെ.പി പറഞ്ഞ് നടന്നിരുന്നത്. ഇപ്പോള്‍ എന്തായി എന്നും ബാലന്‍ ചോദിച്ചു.

അന്‍വര്‍ ഉയര്‍ത്തിയ ആരോപണങ്ങളില്‍ ശക്തമായ നടപടി സര്‍ക്കാര്‍ സ്വീകരിച്ചിട്ടുണ്ട്. പക്ഷെ അദ്ദേഹം അന്വേഷണത്തോട് സഹകരിക്കുന്നില്ല. ഉന്നയിച്ച ആരോപണങ്ങള്‍ തിരിച്ചടിക്കുമോ എന്ന ഭയമാണോ ഇതിന് പിന്നില്‍. ബാലന്‍ പറഞ്ഞു. ഇതൊക്കെ അവസാനിപ്പിക്കുന്നതാണ് നല്ലതെന്നും ബാലന്‍ കൂട്ടിച്ചേര്‍ത്തു.