മലപ്പുറം: ലോക്‌സഭാ ഉപതെരഞ്ഞെടുപ്പിലെ എല്‍.ഡി.എഫ് സ്ഥാനാര്‍ഥി എം.ബി ഫൈസലിനും ഭാര്യയ്ക്കുമുള്ളത് 13.7 ലക്ഷം രൂപയുടെ സ്വത്ത്. ഫൈസലിന്റെ പേരില്‍ 7.25 ലക്ഷത്തിന്റെയും ഭാര്യയുടെ പേരില്‍ 6.45 ലക്ഷത്തിന്റെയും സ്വത്താണുള്ളത്. നാമനിര്‍ദേശ പത്രികക്കൊപ്പം സമര്‍പ്പിച്ച സത്യവാങ്മൂലത്തിലെ കണക്കാണിത്.

ഫൈസലിന്റെ കൈവശം 2,000 രൂപയാണുള്ളത്. സൗത്ത് ഇന്ത്യന്‍ ബാങ്കിന്റെ എടപ്പാള്‍ ശാഖയില്‍ 1,200 രൂപയുടെയും രണ്ട് എല്‍.ഐ.സി പോളിസികളിലായി 3.06 ലക്ഷം രൂപയുടെയും നിക്ഷേപമുണ്ട്.

നാലു ലക്ഷം രൂപ വിലയുള്ള കാറും 15,000 രൂപ വിലയുള്ള മോട്ടോര്‍ സൈക്കിളും സ്വന്തമായുണ്ട്. ഭാര്യയ്ക്കു 240 ഗ്രാം സ്വര്‍ണമുണ്ട്. ഇതിന് ആറു ലക്ഷം രൂപയുടെ മൂല്യമുണ്ട്. പോസ്റ്റ് ഓഫിസില്‍ 44,550 രൂപയുടെ നിക്ഷേപവും കൈവശം ആയിരം രൂപയുമുണ്ട്. ഫൈസലിന്റെ പേരില്‍ നാലു കേസുകളുമുണ്ട്.