കോയമ്പത്തൂര്‍: നുങ്കംപാക്കം റെയില്‍വേ സ്റ്റേഷനില്‍ ഇന്‍ഫോസിസ് എന്‍ജിനിയറായ സ്വാതി(24)യെ കൊലപ്പെടുത്തിയ കേസില്‍ ചെന്നൈ ഹൈക്കോടതിയുടെ രൂക്ഷ വിമര്‍ശനം. ജസ്റ്റിസ് നാഗമുത്തു, ജസ്റ്റിസ് ഭാരതി ദാസന്‍ എന്നിവരടങ്ങിയ ഡിവിഷന്‍ ബെഞ്ചാണ് സ്വമേധയാ കേസ് പരിഗണിച്ചത്. കേസ് അന്വേഷണത്തില്‍ റെയില്‍വേ പൊലിസും ചെന്നൈ സിറ്റി പൊലിസും രണ്ടുതട്ടിലാണെന്ന പത്രവാര്‍ത്തകള്‍ കോടതി സര്‍ക്കാര്‍ അഭിഭാഷകന്റെ ശ്രദ്ധയില്‍പ്പെടുത്തി.
സിറ്റി പൊലിസ് സഹകരിക്കാത്തതാണ് പ്രതിയെ പിടിക്കാന്‍ റെയില്‍വേ പൊലിസിനു കഴിയാത്തതിനു കാരണമെന്ന പത്രവാര്‍ത്തകള്‍ നിസാരമായി കാണാന്‍ കഴിയില്ലെന്നു കോടതി മുന്നറിയിപ്പ് നല്‍കി. തിരക്കേറിയ ഒരു റെയില്‍വേ സ്റ്റേഷനില്‍ നടന്ന കൊലപാതക കേസിലെ പ്രതിയെ എന്തുകൊണ്ട് ഇത്രയായിട്ടും അറസ്റ്റ് ചെയ്തില്ല. രണ്ട് മണിക്കൂര്‍ സ്വാതിയുടെ ജഡം എന്തിന് പ്ലാറ്റ്‌ഫോമില്‍ കിടത്തി, മൃതദേഹത്തിനു മീതെ എന്തുകൊണ്ട് തുണി ചാര്‍ത്തിയില്ല, കേസ് അന്വേഷണം ലാഘവത്തോടെ കൈകാര്യം ചെയ്തതെന്തുകൊണ്ട്, തുടങ്ങിയ ചോദ്യങ്ങള്‍ കോടതി ഉന്നയിച്ചു. കോടതിയിലെത്തുന്ന കേസുകള്‍ മാത്രമേ കോടതി പരിഗണിക്കുകയുള്ളൂവെന്ന ധാരണ ആര്‍ക്കും വേണ്ട. സമൂഹത്തില്‍ നടക്കുന്ന ഇത്തരം കുറ്റകൃത്യങ്ങള്‍ക്കു നേരെ കോടതിക്കു കണ്ണടയ്ക്കാനാവില്ലെന്നു ജഡ്ജിമാര്‍ പറഞ്ഞു.
കേസിന്റെ പൂര്‍ണ വിവരങ്ങള്‍ തമിഴ്‌നാട് സര്‍ക്കാരും, ഡി.ജി.പി.യും തിങ്കളാഴ്ച മൂന്നു മണിക്കകം കോടതിയില്‍ സമര്‍പിക്കണമെന്നു ഹൈക്കോടതി ഉത്തരവിട്ടു.