ജിദ്ദ: ലോകത്തെ ഏറ്റവും സ്വാധീനമുള്ള വ്യക്തികളുടെ പട്ടികയില്‍ സഊദി കിരീടാവകാശിയും. അമേരിക്കയിലെ ഫോര്‍ബ്‌സ് ബിസിനസ് മാഗസിന്‍ പുറത്തുവിട്ട പട്ടികയില്‍ എട്ടാം സ്ഥാനക്കാരനാണ് മുഹമ്മദ് ബിന്‍ സല്‍മാന്‍ രാജകുമാരന്‍. അഴിമതിക്കെതിരേയുള്ള ശക്തമായ പോരാട്ടം, രാജ്യത്ത് നടപ്പാക്കുന്ന വന്‍വികസന പദ്ധതി തുടങ്ങി രാജ്യത്തിന്റെ സമഗ്ര പുരോഗതി ലക്ഷ്യമാക്കിയുള്ള പ്രവര്‍ത്തനമാണ് കിരീടാവകാശി മുഹമ്മദ് ബിന്‍ സല്‍മാന്‍ രാജകുമാരന് ലോക ശ്രദ്ധ നേടിക്കൊടുത്തത്.
രാജ്യത്ത് നടപ്പാക്കുന്ന സാമൂഹിക പരിഷ്‌കരണങ്ങള്‍ അടക്കം പല വിഷയങ്ങളും കിരീടാവകാശിയെ ഏറ്റവും സ്വാധീനമുള്ള വ്യക്തികളുടെ പട്ടികയില്‍ ഇടം നേടിക്കൊടുക്കുന്നതില്‍ വലിയ പങ്ക് വഹിച്ചിട്ടുണ്ട്. അറബ് ലോകത്ത് ഏറ്റവും സ്വാധീനമുള്ള വ്യക്തികളില്‍ ഒന്നാമനായും മുഹമ്മദ് ബിന്‍ സല്‍മാന്‍ രാജകുമാരന്‍ തിരഞ്ഞെടുക്കപ്പെട്ടിരുന്നു. ചൈനീസ് പ്രസിഡന്റ് ഷി ജിന്‍ പിങ് ആണ് ലോകത്തെ ഏറ്റവും സ്വാധീനമുള്ള വ്യക്തികളുടെ പട്ടികയില്‍ ഒന്നാം സ്ഥാനത്ത്. റഷ്യന്‍ പ്രസിഡന്റ് വ്‌ളാദ്മിര്‍ പുടിന്‍ രണ്ടാം സ്ഥാനത്തും അമേരിക്കന്‍ പ്രസിഡന്റ് ഡൊണാള്‍ഡ് ട്രംപ് മൂന്നാം സ്ഥാനത്തും ഇടംപിടിച്ചു.