ചെങ്ങന്നൂര്‍: കേസ് നടത്തിപ്പുമായി ബന്ധപ്പെട്ട് ആരോപണമുന്നയിച്ച കൊല്ലക്കടവ് സ്വദേശിക്കും അപകീര്‍ത്തികരമായി വാര്‍ത്ത പ്രസിദ്ധീകരിച്ച ദേശാഭിമാനി പത്രത്തിനുമെതിരേ യു.ഡി.എഫ് സ്ഥാനാര്‍ഥി ഡി. വിജയകുമാര്‍ വക്കീല്‍ നോട്ടിസ് അയച്ചു. ദേശാഭിമാനി പ്രിന്ററും പബ്ലിഷറുമായ കെ.ജെ തോമസ്, ചീഫ് എഡിറ്റര്‍ എം.വി ഗോവിന്ദന്‍, പ്രാദേശിക ലേഖകന്‍ സുദീപ്, ആരോപണമുന്നയിച്ച വാസുദേവന്‍ നായര്‍ എന്നിവര്‍ക്കാണ് നോട്ടിസ് അയച്ചത്.
ഏഴുദിവസത്തിനകം ഖേദം പ്രകടിപ്പിച്ചില്ലെങ്കില്‍ 10 കോടി നഷ്ടപരിഹാരം ആവശ്യപ്പെട്ട് സിവിലായും ക്രിമിനലായും തുടര്‍നടപടി സ്വീകരിക്കുമെന്നാണ് നോട്ടിസില്‍ പറയുന്നത്. താന്‍ വാങ്ങിയ 22 സെന്റ് വസ്തുവിലേക്കുള്ള നടപ്പുവഴി സംബന്ധിച്ച കേസില്‍ വിജയകുമാര്‍ എതിര്‍കക്ഷിയുമായി ഒത്തുകളിച്ച് കേസ് തോറ്റുകൊടുത്തുവെന്ന ആരോപണമാണ് വാസുദേവന്‍ നായര്‍ ഉയര്‍ത്തുന്നത്.