ആലപ്പുഴ: മാര്‍ഗ്ഗതടസം സൃഷ്ടിച്ച് വീടിന് മുന്നില്‍ അപകടകരമാംവിധം ഫ്‌ളക്‌സ് സ്ഥാപിച്ചെന്ന് കാട്ടി നല്‍കിയ പരാതി എതിര്‍കക്ഷിയ്ക്ക് പൊലിസ് ചോര്‍ത്തി നല്‍കിയതിനെത്തുടര്‍ന്ന് ഒരുസംഘം വീട്ടിലെത്തി ഭീഷണിപ്പെടുത്തിയെന്ന് പരാതി.
റിട്ട. എസ്.പി കെ.എന്‍ ബാല്‍ ആണ് പൊലിസിനെതിരേയും ഭീഷണി മുഴക്കിയ സംഘത്തിനെതിരേയും കളക്ടര്‍ക്ക് പരാതി നല്‍കിയത്.
ജില്ലാ ആശുപത്രിയ്ക്ക് പടിഞ്ഞാറുഭാഗത്തുള്ള തീയറ്ററിലെ സിനിമയുടെ ഫ്‌ളക്‌സ് ബോര്‍ഡ് ട്രാന്‍ഫോര്‍മറിന് മുകളില്‍ വൈദ്യുതി ലൈനോട് ചേര്‍ന്ന് ഒരു സംഘം ചെറുപ്പക്കാര്‍ സ്ഥാപിക്കുന്നത് അപകടമുണ്ടാക്കുമെന്നും നിരന്തരം വൈദ്യുതി നിലയ്ക്കുന്നത് സമീപത്തെ വീടുകളിലും തനിക്കും ബുദ്ധിമുട്ടുണ്ടാക്കുന്നുവെന്നും കെ.എന്‍ ബാല്‍ എസ്.പിയെ വിളിച്ചറിയിക്കുകയായിരുന്നു.
എസ്.പി മീറ്റിങില്‍ ആയതിനാല്‍ എസ്.പിയുടെ കോണ്‍ഫിഡന്‍ഷ്യല്‍ അസിസ്റ്റന്റ് അത് ട്രാഫിക്ക് സ്റ്റേഷനില്‍ വിളിച്ചറിയിച്ചു.
എന്നാല്‍ ഇതിന് പിന്നാലെ ഫ്‌ളക്‌സ് സ്ഥാപിച്ച സംഘം വീട്ടിലെത്തി പരാതി പിന്‍വലിക്കണമെന്നും മറ്റും ഭീഷണിപ്പെടുത്തുകയായിരുന്നു.
ഈ വിവരം വീണ്ടും എസ് പിയെ വിളിച്ചറിയിച്ചപ്പോള്‍ ആലപ്പുഴ സൗത്ത് എസ്.ഐ സ്ഥലത്തെത്തിയെങ്കിലും എതിര്‍ കക്ഷികള്‍ക്ക് അനുകൂലമായ നിലപാടാണ് സ്വീകരിച്ചത്.
പൊലിസിന്റെ സാന്നിധ്യത്തില്‍ ഫ്‌ളക്‌സ് കൂടുതല്‍ അപകടകരമാം വിധം സ്ഥാപിക്കുകയാണുണ്ടായതെന്ന് പരാതിയില്‍ പറയുന്നു.
താന്‍ നല്‍കിയ പരാതി എതിര്‍കക്ഷിയ്ക്ക് ചോര്‍ത്തിക്കൊടുത്തവര്‍ക്കെതിരെ നടപടി സ്വീകരിക്കണമെന്നാണ് ആവശ്യം.
കഴിഞ്ഞ ദിവസമാണ് ഫാന്‍സ് അസോസിയേഷനും ഡി.വൈ.എഫ്.ഐ പ്രാദേശിക നേതൃത്വത്തിലെ ചിലരും ചേര്‍ന്ന് ഫ്‌ളക്‌സ് സ്ഥാപിച്ചത്.