മോസ്‌ക്കോ: റഷ്യന്‍ ലോകകപ്പ് പോരാട്ടങ്ങള്‍ക്ക് ആവേശം പകരുന്നതിനായി ഫിഫയുടെ ഔദ്യോഗിക ഗാനം പുറത്തിറങ്ങി. ''ലിവ് ഇറ്റ് അപ്പ് '' എന്ന പേരിലുള്ള ഗാനമൊരുക്കിയിരിക്കുന്നത് ഹോളിവുഡ് താരവും റാപ് സങ്ീതജ്ഞനുമായ വില്‍ സ്മിത്താണ്. ഒപ്പം നിക്ക ജാം, കൊസോവ ഗായിക എറ ഇസ്‌ട്രേഫി എന്നിവരുമുണ്ട്. അമേരിക്കന്‍ ഡാന്‍സ് ജോക്കി ഡിപ്ലോയാണ് നിര്‍മാതാവ്. കൊളംബിയയില്‍ വച്ച് ചിത്രീകരിച്ച ഗാനം ലോകകപ്പ് ഉദ്ഘാടന വേദിയില്‍ വച്ച് വില്‍ സ്മിത്തും സംഘവും ആലപിക്കും.
1998ല്‍ പുറത്തിറങ്ങിയ റിക്കി മാര്‍ട്ടിന്റെ ദി കപ്പ് ഓഫ് ലൈഫും 2010ലെ ദക്ഷിണാഫ്രിക്കന്‍ ലോകകപ്പിനായി ഷക്കീറ ആലപിച്ച വക്കാ വക്കാ എന്ന് തുടങ്ങുന്ന ഗാനവുമാണ് ഇക്കൂട്ടത്തില്‍ ശ്രദ്ധേയമായത്. കഴിഞ്ഞ ലോകകപ്പിനായി ജെന്നിഫര്‍ ലോപസിന്റെ നേതൃത്വത്തിലിറങ്ങിയ വി ആര്‍ വണ്‍ എന്ന ഗാനം നിരാശ സമ്മാനിക്കുന്നതായിരുന്നു.
അതേസമയം പുറത്തിറങ്ങിയ പുതിയ ഗാനത്തെ അനുകൂലിച്ചും പ്രതികൂലിച്ചും സമൂഹ മാധ്യമങ്ങളിലൂടെ ഫുട്‌ബോള്‍ പ്രേമികള്‍ രംഗത്തെത്തിയിട്ടുണ്ട്. ഗാനത്തിന്റെ ലാറ്റിനമേരിക്കന്‍ ഛായയിലുള്ള ഈണത്തിനെതിരേയാണ് പ്രധാന വിമര്‍ശനം.