അബൂദബിയിലെ സ്വകാര്യ സ്‌കൂള്‍ നിയമനങ്ങള്‍ക്ക് കര്‍ശന നിര്‍ദേശങ്ങള്‍ പുറപ്പെടുവിച്ച് വിദ്യാഭ്യാസ വകുപ്പ്. പ്രധാനപ്പെട്ട ആറ് തസ്തികകളില്‍ മുഴുവന്‍ സമയ ജീവനക്കാര്‍ നിര്‍ബന്ധമാണെന്ന് വിദ്യാഭ്യാസ അതോറിറ്റിയായ അഡെക് നിര്‍ദേശിച്ചു. ഇതില്‍ ഒന്നുപോലും ഒഴിച്ചിടാന്‍ പാടില്ല, മാത്രമല്ല അധ്യാപകരെ പുറത്താക്കാനും രാജി സമര്‍പ്പിക്കാനും ഇനി അഡെക്കിന്റെ അനുമതി ആവശ്യമാണ്.

അബൂദബിയിലെ സ്വകാര്യ സ്‌കൂളുകളില്‍ പ്രിന്‍സിപ്പല്‍, വൈസ് പ്രിന്‍സിപ്പല്‍, ചീഫ് ഇന്റഗ്രേഷന്‍ ഓഫിസര്‍, ഹെല്‍ത് ആന്‍ഡ് സെക്യൂരിറ്റി ഓഫിസര്‍, സോഷ്യല്‍ വര്‍ക്കര്‍, നഴ്‌സ് തുടങ്ങിയ ആറ് തസ്തകകളില്‍ ഇനി മുഴുവന്‍ സമയ ജീവനക്കാര്‍ നിര്‍ബന്ധമായിരിക്കും. ഈ വര്‍ഷത്തോടെ സ്‌കൂളുകളില്‍ ക്ലിനിക്ക്, പുകവലി രഹിത കാമ്പസ് എന്നിവ ഉറപ്പാക്കണം. ഉയര്‍ന്ന ഗ്രേഡുള്ള സ്‌കൂളില്‍ കരിയര്‍, യൂണിവേഴ്‌സിറ്റി കൗണ്‍സിലര്‍ തുടങ്ങിയ പദവികളില്‍ ജീവനക്കാര്‍ വേണം. അതേസമയം, 500 കുട്ടികളില്‍ താഴെയുള്ള പുതിയ സ്‌കൂളുകളില്‍ ആദ്യ അഞ്ചുവര്‍ഷം വൈസ് പ്രിന്‍സിപ്പല്‍ വേണമെന്ന വ്യവസ്ഥയില്‍ ഇളവുണ്ടാകും. അതേസമയം ആക്ടിങ് സീനിയര്‍ അക്കാദമിക് ലീഡറുണ്ടായിരിക്കണം.

യോഗ്യതാ മാനദണ്ഡങ്ങള്‍ പാലിക്കാത്ത നിലവിലെ ജീവനക്കാര്‍ക്ക് പദവികളില്‍ തുടരാനുള്ള മാനദണ്ഡങ്ങളും അഡെക് വ്യക്തമാക്കിയിട്ടുണ്ട്. ലീഡര്‍ഷിപ് പദവികളില്‍ തുടരുന്ന അധ്യാപന പരിചയമില്ലാത്ത ജീവനക്കാര്‍ 2026-2027 അക്കാദമിക വര്‍ഷത്തിലെ ആദ്യ സെമസ്റ്ററിന് മുമ്പായി ലീഡര്‍ഷിപ്പ് ലൈസന്‍സ് നേടിയിരിക്കണം. അധ്യാപക യോഗ്യതാ സര്‍ട്ടിഫിക്കറ്റില്ലാത്തവര്‍ക്ക് തൊഴില്‍ കരാര്‍ പുതുക്കിയിട്ടുണ്ടെങ്കില്‍ ജോലിയില്‍ തുടരാന്‍ സാധിക്കും, അല്ലെങ്കില്‍ ലെവല്‍ 6 യോഗ്യത നേടി മറ്റൊരു സ്‌കൂളില്‍ പുതിയ ജോലിക്ക് ചേരാം. അല്ലാത്തപക്ഷം, അടുത്ത അധ്യയന വര്‍ഷത്തോടെ അധ്യാപന ലൈസന്‍സ് നേടണം. 

അധ്യാപന യോഗ്യത നേടാന്‍ ശ്രമം നടത്തുന്നതിന്റെ രേഖകള്‍ ഹാജരാക്കിയും തൊഴില്‍ കരാര്‍ പുതുക്കാവുന്നതാണ്. ഒരേ മാനേജ്‌മെന്റിന് കീഴിലുള്ള ജീവനക്കാരുടെ ആഭ്യന്തര സ്ഥലംമാറ്റം ഒഴികെയുള്ള നിയമനങ്ങള്‍ക്ക് വിദ്യാഭ്യാസ വകുപ്പിന്റെ പുതിയ യോഗ്യതാ മാനദണ്ഡം പാലിച്ചിരിക്കണം. അധ്യാപകര്‍ക്ക് രാജി വെക്കാനും, അധ്യാപകരെ പുറത്താക്കാനും, അഡെക്കിന്റെ മുന്‍കൂര്‍ അനുമതി നേടിയിരിക്കണമെന്നും പുതിയ റിക്രൂട്ട്‌മെന്റ് നയത്തില്‍ വ്യക്തമാക്കുന്നു.

കൂടൂതൽ ​ഗൾഫ് വാർത്തകളറിയാൻ ഈ ഗ്രൂപ്പിൽ ജോയിൻ ചെയ്യുക

The Abu Dhabi Department of Education and Knowledge (ADEK) has introduced stringent guidelines for private school recruitment. These rules aim to ensure quality education and safeguard student welfare.