എരുമപ്പെട്ടി: മദ്ദള വാദ്യകലയിലെ കുലപതി നെല്ലുവായ് ശശിയെ ജന്‍മനാട് ആദരിച്ചു. മൂന്ന് പതിറ്റാണ്ടിലധികമായി ഈ രംഗത്ത് ശ്രദ്ധേയനായ ഇദ്ദേഹത്തെ ശിഷ്യരും നാട്ടുകാരും വാദ്യ പ്രേമികളും ചേര്‍ന്നാണ് ആദരിച്ചത്.
പൊതു സമ്മേളനം മന്ത്രി എ.സി മൊയ്തീന്‍ ഉദ്ഘാടനം ചെയ്തു. കലാകാരന്‍മാര്‍ ആദരിക്കപ്പെടുമ്പോള്‍ നാടും സ്വയം ആദരിക്കപ്പെടുന്നുവെന്നും മതത്തിന്റെ അതിര്‍വരമ്പുകളില്ലാതെ മാനവികതയുടെ തലങ്ങള്‍ക്ക് പ്രാധാന്യം നല്‍കുന്നവരാണ് കേരളത്തിലെ കലാകാരെന്നും മന്ത്രി പറഞ്ഞു.
എരുമപ്പെട്ടി ഗ്രാമപഞ്ചായത്ത് പ്രസിഡന്റ് മീന ശലമോന്‍ അധ്യക്ഷയായി. പത്മശ്രീ കലാമണ്ഡലം ഗോപി നെല്ലുവായ് ശശിക്ക് വീര ശൃംഖല സമര്‍പ്പിച്ചു. തന്ത്രി കീഴ് മുണ്ടയൂര്‍ പരമേശ്വരന്‍ നമ്പൂതിരിപ്പാട് അനുഗ്രഹ പ്രഭാഷണം നടത്തി. കേരള കലാമണ്ഡലം വൈസ് ചാന്‍സലര്‍ ഡോ.ടി.കെ നാരായണന്‍ കീര്‍ത്തിഫലക സമര്‍പ്പണം നടത്തി.
പത്മശ്രീ ഡോ.സുന്ദരമേനോന്‍ പൊന്നാട അണിയിച്ചു. പത്മശ്രീ പെരുവനം കുട്ടന്‍മാരാര്‍ കീര്‍ത്തിപത്ര സമര്‍പ്പണം നടത്തി. പത്മശ്രീ മട്ടന്നൂര്‍ ശങ്കരന്‍കുട്ടി മാരാര്‍ ഉപഹാരം സമര്‍പ്പിച്ചു.