തിരുവനന്തപുരം: മന്ത്രിസ്ഥാനം ഏറ്റെടുത്താല്‍ കെ.എസ്.ആര്‍.ടി.സിയെ ലാഭത്തിലാക്കാന്‍ ശ്രമിക്കുമെന്ന് തോമസ് ചാണ്ടി എം.എല്‍.എ. ജനങ്ങള്‍ക്ക് സന്തോഷത്തോടെ യാത്ര ചെയ്യാവുന്ന ഒരു സംവിധാനമാക്കി കെ.എസ്.ആര്‍.ടിസിയെ മാറ്റുമെന്നും അദ്ദേഹം പറഞ്ഞു.
മറ്റു സംസ്ഥാനങ്ങളിലെല്ലാം പൊതുമേഖല ട്രാന്‍സ്‌പോര്‍ട്ട് കമ്പനികള്‍ ലാഭത്തിലാണ്. ഇവിടെ മാത്രം നഷ്ടത്തില്‍ പ്രവര്‍ത്തിക്കുന്നു. ഇതിന്റെ യഥാര്‍ഥ കാരണം എന്തെന്നു കണ്ടെത്തി പരിഹരിക്കും. എന്നാല്‍, ഇതു പെട്ടെന്നു നടക്കുന്ന കാര്യമല്ല. രണ്ടുമൂന്നു വര്‍ഷങ്ങളെങ്കിലും ഇതിനു വേണ്ടിവരും.
വിദേശത്ത് വിദ്യാഭ്യാസ സ്ഥാപനങ്ങള്‍ തുടങ്ങി വിജയകരമായി നടത്തിക്കൊണ്ടുപോകുന്ന അനുഭവസമ്പത്തുണ്ട്. മന്ത്രിയെന്ന നിലയിലുള്ള പ്രവര്‍ത്തനത്തിന് അതു തുണയാകുമെന്ന് പ്രതീക്ഷിക്കുന്നു. മന്ത്രിസ്ഥാനം ഒരിക്കലും ആഗ്രഹിച്ചതല്ല. പാര്‍ട്ടി ആവശ്യപ്പെട്ടതുകൊണ്ട് ഏറ്റെടുക്കുകയാണ്. ജുഡീഷ്യല്‍ അന്വേഷണത്തില്‍ എ.കെ ശശീന്ദ്രന്‍ നിരപരാധിയാണെന്നു തെളിഞ്ഞാലുടന്‍ മന്ത്രിസ്ഥാനം രാജിവച്ച് അദ്ദേഹത്തിനു വീണ്ടും മന്ത്രിയാകാന്‍ വഴിയൊരുക്കുമെന്നും തോമസ് ചാണ്ടി പറഞ്ഞു.