മനാമ: ബഹ്‌റൈനിലെ പ്രവാസി സംഘടനയായ ഇന്‍ഡക്‌സ് ബഹ്‌റൈനിന്റെ നേതൃത്വത്തില്‍ സമാഹരിച്ച ഉപയോഗിച്ച സ്‌കൂള്‍ പാഠപുസ്തകങ്ങളുടെ വിതരണം ഈ മാസം 30ന് വ്യാഴാഴ്ച ബഹ്‌റൈന്‍ കേരളീയ സമാജത്തില്‍ നടക്കുമെന്ന് ബന്ധപ്പെട്ടവര്‍ വാര്‍ത്താസമ്മേളനത്തില്‍ അറിയിച്ചു.
പുസ്തകങ്ങള്‍ ആവശ്യമുള്ള വിദ്യാര്‍ഥികള്‍ക്കും അവരുടെ രക്ഷിതാക്കള്‍ക്കും വ്യാഴാഴ്ച വൈകിട്ട് ഏഴു മുതല്‍ രാത്രി 10 വരെ കേരളീയ സമാജം ഹാളില്‍ പുസ്തകങ്ങള്‍ സൗജന്യമായി വിതരണം ചെയ്യും. ബഹ്‌റൈനിലെ സ്‌കൂള്‍ വിദ്യാര്‍ഥികളുടെ ഉപയോഗിച്ച പുസ്തകങ്ങളാണ് സംഘടന ശേഖരിച്ച് വിതരണം ചെയ്യുന്നത്. മൂന്നാഴ്ചക്കിടെ 1,000ത്തിലധികം പേര്‍ക്ക് വിതരണം ചെയ്യാന്‍ സാധിക്കുന്നത്ര പുസ്തകങ്ങള്‍ ശേഖരിക്കാനായിട്ടുണ്ടെന്ന് ഭാരവാഹികള്‍ അറിയിച്ചു. പുനരുപയോഗത്തിന്റെ സന്ദേശം പ്രചരിപ്പിക്കുക, പുസ്തകങ്ങള്‍ വാങ്ങാന്‍ പ്രയാസപ്പെടുന്നവര്‍ക്ക് സഹായമാവുക, പ്രകൃതി സ്‌നേഹത്തിന്റെ പാഠങ്ങള്‍ പുതുതലമുറക്ക് കൈമാറുക തുടങ്ങിയ ലക്ഷ്യങ്ങള്‍ മുന്‍നിര്‍ത്തിയാണ് പദ്ധതി തയാറാക്കിയതെന്നും ഇതിന് വന്‍ സ്വീകാര്യതയാണ് ലഭിച്ചതെന്നും ബന്ധപ്പെട്ടവര്‍ പറഞ്ഞു.