കോട്ടയം: കെവിന്റെ കൊലപാതകവുമായി ബന്ധപ്പെട്ട് അറസ്റ്റിലായ പൊലിസുകാര്‍ കൈക്കൂലി വാങ്ങിയതുമായി ബന്ധപ്പെട്ട കേസിന്റെ അന്വേഷണം ചങ്ങനാശ്ശേരി ഡിവൈ.എസ്.പിക്ക് കൈമാറി.
നിലവില്‍ കേസന്വേഷിക്കുന്ന ഡി.സി.ആര്‍.ബി ഡിവൈ.എസ്.പി ഗിരീഷ് പി. സാരഥിയെ മാറ്റിയാണ് ചങ്ങനാശ്ശേരി ഡിവൈ.എസ്.പി എസ്. ശ്രീകുമാറിന് അന്വേഷണച്ചുമതല നല്‍കിയത്. കേസിലെ മുഖ്യപ്രതിയായ സാനു ചാക്കോയില്‍നിന്ന് എ.എസ്.ഐ ബിജുവും പോലിസ് ഡ്രൈവര്‍ അജയകുമാറും കൈക്കൂലി വാങ്ങിയെന്നായിരുന്നു കേസ്. ഇവര്‍ കൈക്കൂലി വാങ്ങിയെന്ന് കാട്ടി പരാതി നല്‍കിയത് ഗിരീഷ് പി. സാരഥിയായിരുന്നു.
പരാതിക്കാരന്‍തന്നെ കേസന്വേഷണം നടത്തുന്നത് ഉചിതമല്ലെന്ന നിയമോപദേശത്തിന്റെ അടിസ്ഥാനത്തിലാണ് തീരുമാനം. അതേസമയം, കെവിന്റെ കൊലപാതകക്കേസ് അന്വേഷണസംഘത്തില്‍ ഡിവൈ.എസ്.പി ഗിരീഷ് തുടരും.
അതേസമയം, കെവിന്‍ കൊലക്കേസില്‍ പ്രധാന പ്രതി സാനുവടക്കം ഒന്‍പതുപേരാണ് പൊലിസിന്റെ പിടിയിലുള്ളത്. ബാക്കിയുള്ള അഞ്ചുപേര്‍ക്കായി പൊലിസ് അന്വേഷണം ഉര്‍ജിതമാക്കിയിരിക്കുകയാണ്.
വിമാനത്താവളങ്ങള്‍ കേന്ദ്രീകരിച്ചും അന്വേഷണം നടക്കുന്നുണ്ട്. സാനു ചാക്കോ, നിയാസ്‌മോന്‍, ഇഷാന്‍, റിയാസ്, ചാക്കോ ജോണ്‍, മനു മുരളീധരന്‍, ഷെഫിന്‍, നിഷാദ്, ടിറ്റു ജെറോം എന്നിവരാണ് പിടിയിലായത്. നീനുവിന്റെ മാതാവ് രഹ്‌ന, റമീസ്, ഫസല്‍, ഷാനു, ഷിനു എന്നിവര്‍ക്കുവേണ്ടിയുള്ള തിരച്ചില്‍ പുരോഗമിക്കുകയാണ്.
മുഖ്യപ്രതി സാനുവിന്റെ മാതാവ് രഹ്‌ന മുന്‍കൂര്‍ ജാമ്യത്തിനുള്ള ശ്രമം തുടങ്ങിയിട്ടുണ്ട്. ജാമ്യം ലഭിക്കുന്നതിന് മുന്‍പ് രഹ്‌നയെ കണ്ടെത്താനാണ് പൊലിസ് നീക്കം.