കൊച്ചി: കൊവിഡ് -19 ഗള്‍ഫ് നാടുകളില്‍ പിടിമുറുക്കിയതോടെ പ്രവാസി കുടുംബങ്ങളും പിരിമുറുക്കത്തില്‍. ഇക്കഴിഞ്ഞ ദിവസങ്ങളില്‍ വിവിധ ഗള്‍ഫ് രാജ്യങ്ങളുടെ തൊഴില്‍ മന്ത്രാലയങ്ങള്‍ പുറപ്പെടുവിച്ച ഉത്തരവുകളാണ് പ്രവാസികളിലും അവരുടെ നാട്ടിലുള്ള കുടുംബങ്ങളിലും ഒരുപോലെ ഭീതിപരത്തിയിരിക്കുന്നത്. കൊവിഡ് വ്യാപനം വാണിജ്യ-വ്യവസായ മേഖലകളെ തകര്‍ത്തതോടെ, പിടിച്ചുനില്‍ക്കാനായി ഗള്‍ഫ് രാജ്യങ്ങള്‍ സ്വകാര്യ സ്ഥാപനങ്ങള്‍ക്ക് കൂടുതല്‍ പ്രവര്‍ത്തന സ്വാതന്ത്ര്യം അനുവദിച്ചിരിക്കുകയാണ്. തൊഴിലാളികളെ യഥേഷ്ടം പിരിച്ചുവിടുന്നതിനും ശമ്പളം വെട്ടിക്കുറക്കുന്നതിനും ശമ്പളമില്ലാത്ത അവധി നല്‍കുന്നതിനുമൊക്കെയാണ് സ്വകാര്യ സ്ഥാപനങ്ങള്‍ക്ക് സ്വാതന്ത്ര്യം നല്‍കിയിരിക്കുന്നത്.യു.എ.ഇയാണ് ഇതിന് തുടക്കംകുറിച്ചത്. യു.എ.ഇയില്‍ സ്വകാര്യ മേഖലയിലെ കമ്പനികള്‍ക്ക് ജീവനക്കാരെ പിരിച്ചുവിടാനും അവശേഷിക്കുന്ന ജീവനക്കാരുടെ ശമ്പളം താല്‍ക്കാലികമായോ,  സ്ഥിരമായോ വെട്ടിക്കുറക്കാനും മാനവ വിഭവശേഷി വികസന-സ്വദേശിവല്‍ക്കരണ മന്ത്രാലയമാണ് അനുമതി നല്‍കിയത്.

ഇതിന് പിന്നാലെ ഖത്തറും സമാന നിലപാടെടുത്തു. കൊവിഡ്-19 കാരണം പ്രതിസന്ധിയിലായ സ്വകാര്യ സ്ഥാപനങ്ങള്‍ക്ക് തൊഴില്‍ നിയമത്തിലെ നിബന്ധനകള്‍പാലിച്ച് തൊഴിലാളികളെ പിരിച്ചുവിടാമെന്ന് തൊഴില്‍ മന്ത്രാലയം അണ്ടര്‍ സെക്രട്ടറി മുഹമ്മദ് ഹസന്‍ അല്‍ ഉബൈദലി വ്യക്തമാക്കി. നിയമപ്രകാരമുള്ള ആനുകൂല്യങ്ങളും കുടിശ്ശിക ശമ്പളവും നാട്ടിലേക്കുള്ള ടിക്കറ്റും നല്‍കിവേണം പിരിച്ചുവിടാനെന്നും നിര്‍ദേശിച്ചിട്ടുണ്ട്. വിവിധ ഗള്‍ഫ് രാജ്യങ്ങളില്‍ നിലവില്‍ ജോലിയുള്ളവരില്‍ വലിയൊരു വിഭാഗത്തിനും മാസങ്ങളായി ശമ്പളം മുടങ്ങിയിരിക്കുകയാണ്. ഗള്‍ഫ് രാജ്യങ്ങളെ ബാധിച്ച സാമ്പത്തിക പ്രതിസന്ധിയാണ് കാരണം. അതിന് പിന്നാലെയാണ് ഇടിത്തീയായി കൊറോണ വൈറസ് ബാധയും എത്തിയത്.

വൈറസ് ബാധയെത്തുടര്‍ന്ന് ഇന്ത്യയും അമേരിക്കയും ജര്‍മ്മനിയുമടക്കമുള്ള രാജ്യങ്ങളെല്ലാം ലോക്ക്ഡൗണ്‍ പ്രഖ്യാപിച്ചിരിക്കുകയാണ്. ഇതുവഴി ഗതാഗതം നിലച്ചതോടെ, എണ്ണ ഉപഭോഗം കുത്തനെ കുറഞ്ഞു. ഇത് ആഗോള വിപണിയില്‍ എണ്ണ വിലയിടിവിനും കാരണമായി. എണ്ണ ഉല്‍പാദകരായ ഗള്‍ഫ് രാജ്യങ്ങളുടെ വരുമാനം ഇതോടെ പകുതിയില്‍ താഴെയായി കുറഞ്ഞു. ഗള്‍ഫില്‍ നിന്നുള്ള വരുമാനം നിലക്കുന്നത് പ്രവാസി കുടുംബങ്ങളുടെ നിത്യജീവിതത്തെ തന്നെ ബാധിച്ചിട്ടുമുണ്ട്. കാര്യമായൊന്നും നീക്കിവെക്കാനില്ലാത്ത സാധാരണക്കാരാണ് പ്രവാസികളില്‍ ഭൂരിഭാഗവും. അതുകൊണ്ടുതന്നെ വരുമാനം നിലക്കുന്നതോടെ പ്രവാസി കുടുംബങ്ങള്‍ പിടിച്ചുനില്‍ക്കാന്‍ കഴിയാത്തവിധം പ്രതിസന്ധിയിലേക്ക് നീങ്ങും.