മുക്കം: പൊതുവിദ്യാഭ്യാസ സ്ഥാപനങ്ങള്‍ സംരക്ഷിക്കേണ്ടത് നാടിന്റെ വളര്‍ച്ചക്ക് അത്യന്താപേക്ഷിതമാണന്ന് സ്പീക്കര്‍ പി.ശ്രീരാമകൃഷ്ണന്‍. കൊടിയത്തൂര്‍ ജി.എം.യു.പി സ്‌കൂളില്‍ നിന്ന് വിരമിക്കുന്ന ടി.കെ.അബൂബക്കര്‍ മാസ്റ്റര്‍ക്ക് കൊടിയത്തൂര്‍ പൗരാവലി നല്‍കിയ സ്വീകരണത്തില്‍ സംസാരിക്കുകയായിരുന്നു അദ്ദേഹം. ഒരു നാടിന്റെ സംസ്‌കാരം വിദ്യാഭ്യാസ മേഖലയുമായി ബന്ധപ്പെട്ടതാണ്. ലോകത്ത് ഇന്ന് കലര്‍പ്പില്ലാതെ കിട്ടുന്നത് സംസ്‌കാരം മാത്രമാണന്നും അദ്ദേഹം കൂട്ടിച്ചേര്‍ത്തു. സര്‍വിസില്‍ നിന്ന് വിരമിക്കുന്നവര്‍ക്കും വിവിധ മേളകളിലെ വിജയികള്‍ക്കും സ്പീക്കര്‍ ഉപഹാരം നല്‍കി. ജോര്‍ജ് എം തോമസ് എം.എല്‍.എ അധ്യക്ഷനായി. സി.ടി.സി അബ്ദുല്ല, മുക്കം മുഹമ്മദ്, കെ.പി.അബ്ദുറഹിമാന്‍,സി.കെ.കാസിം, പി.ടി.എം ഷറഫുന്നീസ, കെ.പി.ചന്ദ്രന്‍, കെ. സാറ, എ ഇ ഒ ലൂക്കോസ് മാത്യു, എ.പി.മുജീബ്, റസാഖ് കൊടിയത്തൂര്‍, കെ.വി.അബ്ദുസ്സലാം, ഉമ്മര്‍ പുതിയോട്ടില്‍, യു.പി.അബ്ദുറസാഖ് സംസാരിച്ചു. ടി. അബൂബക്കര്‍ മറുപടി പ്രസംഗം നടത്തി.