തളിപ്പറമ്പ്: തളിപ്പറമ്പ് മണ്ഡലത്തിനായി ബജറ്റില്‍ ഉള്‍പ്പെട്ടതും സി.ആര്‍.എഫ്, കിഫ്ബി, നബാര്‍ഡ്, പി.എം.എസ്.ജി.വൈ എന്നിവയില്‍ ഉള്‍പ്പെട്ടതുമായ റോഡ,് പാലം എന്നിവയുടെ പ്രവൃത്തികള്‍ തുടങ്ങുന്നതിനുള്ള നടപടി പൂര്‍ത്തിയായതായി ജയിംസ്മാത്യു എം.എല്‍.എ അറിയിച്ചു. ചില റോഡുകളുടെ പ്രവര്‍ത്തനം ആരംഭിക്കുകയും മറ്റു ചിലത് ടെണ്ടര്‍ നടപടി പൂര്‍ത്തീകരിക്കുകയും ചെയ്തിട്ടുണ്ട്. അവശേഷിക്കുന്ന റോഡുകളും പാലങ്ങളും കിഫ്ബിയില്‍ ഉള്‍പെട്ടിട്ടുള്ളവയാണ്. ഇവ ഏഴ് വര്‍ഷം ഗ്യാരണ്ടിയോട് കൂടി കരാറുകാര്‍ നിര്‍മിക്കേണ്ടതാണ്. ഈ റോഡുകള്‍ക്ക് ചുരുങ്ങിയത് 10 മീറ്റര്‍ വീതി ആവശ്യമാണ്. ഫ്രീ സറണ്ടര്‍ വ്യവസ്ഥയില്‍ ഭൂമി ലഭിച്ചാല്‍ മാത്രമേ റോഡുകളുടെ നടപടി ആരംഭിക്കാന്‍ സാധിക്കുകയുള്ളൂ.
കാട്ടാമ്പള്ളി പാലത്തിന്റെ എസ്റ്റിമേറ്റായി. മംഗര പാലത്തിന്റെ ഡി.പി.ആര്‍ തയാറാക്കിവരികയാണ്. ചൊറുക്കള-കണിച്ചാമല്‍ റോഡില്‍ കൊടിലേരി പാലത്തിനും അനുമതി ലഭിച്ചിട്ടുണ്ട്.
2017-18 വര്‍ഷത്തെ ബജറ്റ് പ്രകാരം മണ്ഡലത്തിന് ലഭിച്ചിട്ടുള്ള റോഡുകളുടെയും പാലങ്ങളുടെയും പ്രവര്‍ത്തിയും കാലതാമസം കൂടാതെ ആരംഭിക്കുന്നതിനാവശ്യമായ നടപടികള്‍ സ്വീകരിക്കുന്നതിന് തദ്ദേശ സ്വയംഭരണ സ്ഥാപന ഭാരവാഹികളുടെ യോഗത്തില്‍ തീരുമാനിച്ചിട്ടുണ്ടെന്നും സണ്ണി ജോസഫ് അറിയിച്ചു.