അഹമ്മദാബാദ്: ഗുജറാത്തിലെ അഹമ്മദാബാദിൽ അനധികൃത പടക്ക നിർമാണശാലയിലുണ്ടായ വൻ തീപിടിത്തത്തിലും സ്ഫോടനത്തിലും എട്ടുപേർ കൊല്ലപ്പെട്ടു. പത്തോളം പേർക്ക് പരുക്കേറ്റതായാണ് പ്രാഥമിക വിവരം. അഹമ്മദാബാദ് നഗരത്തിന് പുറത്തുള്ള വസ്ത്രാലിന് സമീപം ഗത്രാഡ് റോഡിൽ പ്രവർത്തിച്ചിരുന്ന കേന്ദ്രത്തിലാണ് ഇന്ന് ഉച്ചയോടെ ദാരുണമായ അപകടമുണ്ടായത്. പരുക്കേറ്റവരെ സമീപത്തെ വിവിധ ആശുപത്രികളിൽ പ്രവേശിപ്പിച്ചു. ഇതിൽ ചിലരുടെ നില ഗുരുതരമാണെന്നാണ് സൂചന.

ഉച്ചയ്ക്ക് 3.24 ഓടെയാണ് പ്രദേശത്തെ നടുക്കിയ വൻ സ്ഫോടന ശബ്ദം കേൾക്കുന്നത്. തൊട്ടുപിന്നാലെ 3.45 ഓടെ റാപ്പിഡ് ആക്‌ഷൻ ഫോഴ്സിന്റെ (RAF) ക്വിക്ക് റിയാക്‌ഷൻ ടീം ആംബുലൻസുകളും ഫയർ ടെൻഡറുകളുമായി സംഭവസ്ഥലത്തെത്തി രക്ഷാപ്രവർത്തനം ആരംഭിച്ചു. സ്ഫോടനത്തിന്റെ ആഘാതം വളരെ വലുതായിരുന്നുവെന്ന് ആർ.എ.എഫ് കമാൻഡന്റ് ഓഫിസർ റിതുൽ ദാഹ് വ്യക്തമാക്കി. മൃതദേഹങ്ങളും പരുക്കേറ്റവരും ഫാക്ടറിക്ക് ചുറ്റുമുള്ള പാടങ്ങളിലേക്ക് 50 മീറ്ററോളം ദൂരത്തിലാണ് തെറിച്ചുവീണതെന്ന് അദ്ദേഹം പറഞ്ഞു.

യാതൊരുവിധ അനുമതികളുമില്ലാതെയാണ് ഈ പടക്ക നിർമാണ യൂണിറ്റ് പ്രവർത്തിച്ചിരുന്നതെന്ന് പ്രാഥമിക അന്വേഷണത്തിൽ പൊലിസ് സ്ഥിരീകരിച്ചിട്ടുണ്ട്. ദുരന്തവിവരമറിഞ്ഞ് അഹമ്മദാബാദ് മുൻസിപ്പൽ കോർപറേഷൻ (AMC) കമ്മിഷണർ, മേയർ എന്നിവരുൾപ്പെടെയുള്ള ഉന്നത ഉദ്യോഗസ്ഥർ സംഭവസ്ഥലം സന്ദർശിച്ച് സ്ഥിതിഗതികൾ വിലയിരുത്തി. മരിച്ചവരുടെയും പരുക്കേറ്റവരുടെയും കൃത്യമായ വിവരങ്ങൾ ശേഖരിച്ചുവരികയാണെന്നും ഔദ്യോഗിക സ്ഥിരീകരണം ഉടനുണ്ടാകുമെന്നും അധികൃതർ അറിയിച്ചു. അഹമ്മദാബാദ് ഫയർ ആൻഡ് എമർജൻസി സർവീസസും (AFES) സിറ്റി പൊലിസും ചേർന്നുള്ള വിപുലമായ രക്ഷാപ്രവർത്തനം പ്രദേശത്ത് തുടരുകയാണ്.

eight people were killed and several others injured after a massive blast ripped through an illegal firecracker factory near ahmedabad in gujarat.