പട്ടാമ്പി: കാറില്‍ അനധികൃതമായി കടത്തുകയായിരുന്ന 1,84,26,000 രൂപ പട്ടാമ്പി പൊലിസ് നടത്തിയ വാഹനപരിശോധനക്കിടെ പിടികൂടി. ഇന്നലെ രാവിലെ 11 മണിക്ക് വിളയൂര്‍ പുലാമന്തോള്‍ പാലത്തിന് സമീപത്ത്് നിന്നാണ് കാറിന്റെ ഡിക്കിയിലുണ്ടായിരുന്ന പണം പിടിച്ചെടുത്തത്. കാറിലുണ്ടായിരുന്ന മലപ്പുറം രാമപുരം പനങ്ങാങ്ങര സ്വദേശികളായ ഹുസൈന്‍(32), സജാദ്(22) എന്നിവരെ അറസ്റ്റ് ചെയ്തു. സേലത്ത് നിന്നും മലപ്പുറത്തേക്ക് കൊണ്ട്‌പോകുകയായിരുന്നു പണമെന്ന് പ്രതികള്‍ സമ്മതിച്ചതായി പൊലിസ് വാര്‍ത്താസമ്മേളനത്തില്‍ അറിയിച്ചു.
ജില്ലാപൊലിസ് മേധാവി ദേബേഷ് കുമാര്‍ ബെഹ്‌റക്ക് ലഭിച്ച രഹസ്യവിവരത്തെ തുടര്‍ന്ന് ഷൊര്‍ണൂര്‍ ഡിവൈ.എസ്.പി മുരളീധരന്റെ നിര്‍ദേശപ്രകാരം പട്ടാമ്പി എസ്.ഐ രമേഷും സംഘവും നടത്തിയ വാഹനപരിശോധനയിലാണ് പണം പിടിച്ചെടുത്തത്. പണത്തിന്റെ ഉറവിടത്തെക്കുറിച്ചും ലക്ഷ്യസ്ഥാനത്തെക്കുറിച്ചും വിശദമായി അന്വേഷണം നടത്തുമെന്ന് പൊലിസ് അറിയിച്ചു. പരിശോധനയില്‍ പട്ടാമ്പി എസ്.ഐ അജീഷ്, എ.എസ്.ഐമാരായ പ്രസാദ്, ശിവശങ്കരന്‍, സീനിയര്‍ സിവില്‍ പൊലിസ് ഓഫിസര്‍മാരായ സുനില്‍, അനൂപ്, പ്രകാശന്‍, സനല്‍, ബിജു, ഷമീര്‍, വിനീഷ്, കബീര്‍, ബ്രജിത്ത്, എസ്.പി.ഒ ധര്‍മേന്ദ്രന്‍ പങ്കെടുത്തു.