ന്യൂഡല്‍ഹി: യോഗാ ഗുരുവും പതഞ്ജലി ഹെര്‍ബല്‍ ആയുര്‍വേദിക് സ്ഥാപകനുമായ ബാബാ രാംദേവിനെതിരേ മുന്‍ ശിഷ്യയായ യുവതിയുടെ നിര്‍ണായക വെളിപ്പെടുത്തല്‍. താന്‍ രാംദേവിന്റെ മുന്‍ അനുയായിയാണെന്നും പേര് മീരയാണെന്നും പരിചയപ്പെടുത്തിയ യുവതി സോഷ്യല്‍മീഡിയയിലാണ് ആരോപണങ്ങള്‍ ഉന്നയിച്ചത്.
കൊലപാതകം ഉള്‍പ്പെടെയുള്ള ആരോപണങ്ങളാണ് രാംദേവിനെതിരേ ഡോ.മീര ഉന്നയിക്കുന്നത്.മുന്‍ ഗുരു രാജീവ് ദീക്ഷിതിന്റെ കൊലപാതകത്തില്‍ ബാബാ രാംദേവിന് പങ്കുണ്ടെന്ന് യുവതി വിഡിയോയിലൂടെ വ്യക്തമാക്കുന്നു. ആറുലക്ഷത്തിനടുത്ത് ആളുകളാണ് ഇതുവരെ വിഡിയോ കണ്ടുകഴിഞ്ഞത്.
ഹരിദ്വാര്‍ സ്വദേശിയായ താന്‍ സന്യാസി ആവണമെന്ന ആഗ്രഹത്തോടെയാണ് രാംദേവിനൊപ്പം ചേര്‍ന്നത്. ചേര്‍ന്നതിന് ശേഷമാണ് യഥാര്‍ഥത്തില്‍ അവിടെ എന്താണ് നടക്കുന്നതെന്ന് മനസിലായത്. അവിടെ മൊത്തം ക്രിമിനലുകളാണ്. അവര്‍ ധരിച്ചിരിക്കുന്നത് വ്യാജ സന്യാസ വേഷമാണെന്ന് താന്‍ തിരിച്ചറിഞ്ഞത് ഏറെ വൈകിയാണെന്നും യുവതി പറയുന്നു.രാംദേവിന്റെ രാജ്യസ്‌നേഹം വ്യാജമാണ്.
മുന്‍ ഗുരു രാജീവ് ദീക്ഷിതിനെ വധിച്ചതിന് പിന്നില്‍ ബാബാ രാംദേവും സംഘവും ആണെന്നുള്ളതിനുള്ള തെളിവ് തന്റെ കൈയിലുണ്ട്. രാദേവിനെതിരായുള്ള തന്റെ തെളിവുകള്‍ 44 പേജുള്ള ഒരു കത്താക്കി പ്രധാനമന്ത്രി മോദിക്ക് അയച്ചിട്ടും കാര്യമുണ്ടായില്ലെന്നും യുവതി വ്യക്തമാക്കുന്നുണ്ട്.രാംദേവിനെതിരേ മൂന്ന് കേസ് കൊടുത്തുവെന്നും അതില്‍ ഒന്ന് മുക്കിയെന്നും രണ്ടെണ്ണം ഇപ്പോള്‍ കോടതിയിലാണെന്നും യുവതി പറഞ്ഞു. പതഞ്ജലിയുടെ പേരില്‍ രാജ്യത്ത് വിറ്റഴിക്കുന്ന ത് വ്യാജ ഉല്‍പന്നങ്ങളാണ്.കൃത്യമായ അന്വേഷണം നടത്തിയാല്‍ ക്രൂരമായ പല സത്യങ്ങളും പുറത്തുവരും.2010 നംവബറില്‍ ചണ്ഡീഗഡില്‍ വച്ചാണ് പതഞ്ജലി എന്ന ആശയം ആദ്യമായി കൊണ്ടുവന്ന ദീക്ഷിത് മരണപ്പെടുന്നത്.
ഇദ്ദേഹത്തിന്റെ കൊലപാതകത്തിന് പിന്നാലെ ബാബാ രാംദേവിനെതിരേ ആരോപണങ്ങള്‍ ഉയര്‍ന്നിരുന്നു. എന്നാല്‍ ഇതെല്ലാം അദ്ദേഹം നിഷേധിച്ചു. കൊലക്കുറ്റം തനിക്കുമേല്‍ ചുമത്താന്‍ ചിലര്‍ മനഃപൂര്‍വം ശ്രമിക്കുയാണെന്നായിരുന്നു രാംദേവിന്റെ പ്രതികരണം.