ന്യൂഡല്‍ഹി: വിമര്‍ശനങ്ങള്‍ക്കൊടുവില്‍ കൊവിഡ് പ്രതിരോധപ്രവര്‍ത്തനങ്ങളിലെ ഡോക്ടര്‍മാര്‍ക്ക് മതിയായ സുരക്ഷ ഉറപ്പു നല്‍കി കേന്ദ്രം. സര്‍ക്കാര്‍ ഡോക്ടമാര്‍ക്കൊപ്പം തന്നെയാണെന്ന് കേന്ദ്ര ആഭ്യന്തരമന്ത്രി അമിത് ഷാ ആവര്‍ത്തിച്ചു. ഡോക്ടര്‍മാര്‍ക്കും ആശുപത്രികള്‍ക്കുമെതിരെ വര്‍ധിച്ചുവരുന്ന ആക്രമണത്തില്‍ പ്രതിഷേധിച്ച് ഇന്ത്യന്‍ മെഡിക്കല്‍ അസോസിയേഷന്റെ നേതൃത്വത്തില്‍ ഇന്ന് വൈറ്റ് അലര്‍ട്ട് നടത്താനിരിക്കേയാണ്, അമിത്ഷായുടെ ഉറപ്പ്. പ്രതിഷേധത്തില്‍ നിന്ന് പിന്‍വാങ്ങണമെന്നും ആഭ്യന്തര മന്ത്രി ഇന്ത്യന്‍ മെഡിക്കല്‍ അസോസിയേഷനോട് (ഐഎംഎ ) ആവശ്യപ്പെട്ടു.

ഐഎംഎ പ്രതിനിധികളുമായി വീഡിയോ കോണ്‍ഫറന്‍സിലൂടെ സംസാരിക്കുകയായിരുന്നു അമിത് ഷാ. കേന്ദ്ര ആരോഗ്യമന്ത്രി ഹര്‍ഷവര്‍ധനും ചര്‍ച്ചയില്‍ പങ്കെടുത്തു.

ഡോക്ടര്‍മാര്‍ക്കും ആശുപത്രികള്‍ക്കും നേരെയുളള അക്രമം തടയാന്‍ ഓര്‍ഡിനന്‍സിലൂടെ നിയമം കൊണ്ടുവരണമെന്ന് ആവശ്യപ്പെട്ടാണ് ഐ.എം.എ ഇന്ന് വൈറ്റ് അലര്‍ട്ട് സംഘടിപ്പിക്കുന്നത്. ഇതിന് ശേഷവും കേന്ദ്ര സര്‍ക്കാരിന്റെ ഭാഗത്ത് നിന്ന് അനുകൂലമായ നടപടി ഉണ്ടായില്ലെങ്കില്‍ ശക്തമായ പ്രതിഷേധ പരിപാടികളുമായി മുന്നോട്ടുപോകുമെന്നും ഐ.എം.എ മുന്നറിയിപ്പ് നല്‍കിയിരുന്നു.