മലപ്പുറം: അറിവുതേടി നവാഗതര്‍ ക്ലാസ്‌റൂമുകളിലെത്തി. രണ്ടര മാസത്തോളം നീണ്ട അവധി തീര്‍ന്ന ആദ്യ ദിനത്തില്‍ ആര്‍ത്തുല്ലസിച്ചു കുരുന്നുകളെത്തിയതോടെ ക്ലാസ്മുറികള്‍ ഉണര്‍ന്നു. വിദ്യാലയ മുറ്റത്തേക്കു മാതാപിതാക്കളുടെ വിരലില്‍ തൂങ്ങിയെത്തിയ പലര്‍ക്കും ആദ്യം അങ്കലാപ്പായിരുന്നു. അതുപിന്നെ കൗതുകത്തിലേക്കും അമ്പരപ്പിലേക്കും വഴിമാറി. പുതിയ കൂട്ടുകാരെ കിട്ടി കളി തുടങ്ങിയോടെ അതു സന്തോഷമായി.
ആദ്യ ദിനത്തിന്റെ ആരവങ്ങള്‍ക്കൊപ്പം ജില്ലയില്‍ ഇന്നലെ രാവിലെ നല്ല മഴയും പെയ്തു. ജില്ലയില്‍ 1,357 സ്‌കൂളുകളിലായി 65,558 പേരാണ് ഇന്നലെ അക്ഷരമുറ്റത്തേക്കു കയറിവന്നത്.
ഒന്നു മുതല്‍ പ്ലസ്ടുവരെ ക്ലാസുകാര്‍ക്കായിരുന്നു ഇന്നലെ പുതിയ അധ്യയന വര്‍ഷത്തിനു തുടക്കമായത്.
തവനൂര്‍ കെ.എംജിയുപി സ്‌കൂളില്‍ നടന്ന ജില്ലാതല പ്രവേശനോത്സവം ജില്ലാപഞ്ചായത്ത് പ്രസിഡന്റ് എ.പി ഉണ്ണികൃഷ്ണന്‍ ഉദ്ഘാടനം ചെയ്തു. വിദ്യാഭ്യാസ സ്റ്റാന്‍ഡിങ് കമ്മിറ്റി ചെയര്‍മാന്‍ വി. സുധാകരന്‍, ജില്ലാപഞ്ചായത്തംഗം എം.ബി ഫൈസല്‍, എസ്.എസ്.എ പ്രൊജക്ട് ഓഫിസര്‍ എസ്.എന്‍ നാസര്‍ പങ്കെടുത്തു.