നായിക്കട്ടി: പൊതു വിദ്യാഭ്യാസ സംരക്ഷണത്തിന് പദ്ധതികള്‍ ആവിഷ്‌കരിച്ച് നടപ്പാക്കുന്നവരുടെ കണ്ണെത്താത്ത ഏകാധ്യാപക വിദ്യാലയത്തിലെ വിദ്യാര്‍ഥികള്‍ക്ക് പഠനോപകരണങ്ങള്‍ എത്തിച്ചു നല്‍കി ചെതലയം സ്വദേശി കുഞ്ഞുമുഹമ്മദ്.
മറ്റ് സര്‍ക്കാര്‍ സ്‌കൂളുകളെ അപേക്ഷിച്ച് പൊതുവേ പൊതുവിദ്യാഭ്യാസ വകുപ്പിന്റെ അവഗണനിരയാകുന്നവരാണ് ഏകാധ്യാപക വിദ്യാലയങ്ങളിലെ വിദ്യാര്‍ഥികളും അധ്യാപകരും. ഇത്തരം വിദ്യാലയങ്ങളിലൊന്നായ നൂല്‍പ്പുഴ പഞ്ചായത്തിലെ ഓടപ്പള്ളം ഏകാധ്യാപക വിദ്യാലയത്തിലെ വിദ്യാര്‍ഥികള്‍ക്കാണ് കുഞ്ഞുമുഹമ്മദ് പഠനോപകരണങ്ങള്‍ എത്തിച്ചു നല്‍കിയത്.
സ്‌കൂളിലെ ഒന്നാം ക്ലാസിലെത്തിയ 10 വിദ്യാര്‍ഥികള്‍ക്കാണ് കുടയും ബാഗുമാണ് നല്‍കിയത്. വര്‍ണ്ണകുടയും പുതിയ ബാഗുംലഭിച്ചതോടെ കുരുന്നുകള്‍ക്കും സന്തോഷം. വിദ്യാര്‍ഥികള്‍ക്ക് മധുരവും നല്‍കിയാണ് കുഞ്ഞുമുഹമ്മദ് യാത്ര പറഞ്ഞിറങ്ങിയത്. 99 ശതമാനവും ഗോത്രവര്‍ഗ്ഗവിദ്യാര്‍ഥികള്‍ പഠിക്കുന്ന സ്‌കൂളാണ് ഓടപ്പള്ളം ഏകാധ്യാപക വിദ്യാലയം. സര്‍ക്കാര്‍ സ്‌കൂളുകളിലും മറ്റും പ്രവേശനോത്സവം ഗംഭീരമാക്കാന്‍ തദ്ദേശ സ്ഥാപനങ്ങള്‍ ഉള്‍പെടെ പണം ചെലവഴിച്ചപ്പോള്‍ അധ്യാപകര്‍ സ്വന്തം കാശ് ചെലവാക്കിയാണ് ഏകാധ്യാപക വിദ്യാലയങ്ങളില്‍ പ്രവേശനോത്സവം സംഘടിപ്പിച്ചിരുന്നത്.