ന്യൂഡല്‍ഹി: കോണ്‍ഗ്രസ് അധ്യക്ഷന്‍ രാഹുല്‍ഗാന്ധിയെ ആക്ഷേപിച്ച് ബി.ജെ.പി എം.പി സരോജ് പാണ്ഡെ. രാഹുല്‍ മന്ദബുദ്ധിയാണെന്നായിരുന്നു പൊതുചടങ്ങിലെ പ്രസംഗത്തിനിടെ സരോജ് പാണ്ഡെയുടെ പരാമര്‍ശം. രാഹുല്‍ പറയുന്ന കാര്യങ്ങള്‍ കേട്ട് ആശ്ചര്യപ്പെടാറുണ്ട്. അദ്ദേഹം കാര്യങ്ങള്‍ പഠിക്കാന്‍ ശ്രമിക്കാറുണ്ടെന്നുള്ളത് സത്യമാണ്. പക്ഷെ 40 വയസിനു ശേഷവും ഇങ്ങനെ പഠിച്ചുകൊണ്ടിരിക്കുന്നയാളെ മന്ദബുദ്ധിയെന്നാണ് വിളിക്കേണ്ടതെന്നും സരോജ് പാണ്ഡെ പറഞ്ഞു. ഛത്തീസ്ഗഡില്‍നിന്നുള്ള രാജ്യസഭാ എം.പിയാണ് സരോജ് പാണ്ഡെ. നേരത്തെ കേരളത്തിലെ സി.പി.എമ്മിനെതിരേയും സരോജ് പാണ്ഡെ ഭീഷണി മുഴക്കിയിരുന്നു. കേരളത്തില്‍ ആര്‍.എസ്.എസ്, ബി.ജെ.പി പ്രവര്‍ത്തകര്‍ക്ക് നേരെ കണ്ണുരുട്ടിയാല്‍ സി.പി.എംകാരുടെ വീട്ടില്‍ കയറി കണ്ണുകള്‍ ചൂഴ്‌ന്നെടുക്കുമെന്നായിരുന്നു സരോജിന്റെ ഭീഷണി.