ന്യൂഡല്‍ഹി: ആരോഗ്യ സ്ഥിതി പരിഗണിച്ച് ഇടക്കാല ജാമ്യം നല്‍കണമെന്ന 1984ലെ ഡല്‍ഹി സിഖ് വംശഹത്യക്കേസില്‍ ശിക്ഷിക്കപ്പെട്ട് ജയിലില്‍കഴിയുന്ന കോണ്‍ഗ്രസ് നേതാവ് സജ്ജന്‍ കുമാറിന്റെ ആവശ്യം പരിഗണിക്കാന്‍ സുപ്രിംകോടതി വിസമ്മതിച്ചു.
സജ്ജന്‍ കുമാറിന്റെ ആരോഗ്യസ്ഥിതി സംബന്ധിച്ച് കോടതി മുന്‍പാകെ എയിംസ് അധികൃതര്‍ സമര്‍പ്പിച്ച റിപോര്‍ട്ടിന്റെ അടിസ്ഥാനത്തില്‍ സജ്ജന്‍കുമാറിന് ജാമ്യം അനുവദിക്കേണ്ട കാര്യമില്ലെന്ന് ചീഫ് ജസ്റ്റിസ് എസ്.എ ബോബ്‌ദെ, ജസ്റ്റിസുമാരായ ഇന്ദു മല്‍ഹോത്ര, ഋഷികേശ് റോയ് എന്നിവരടങ്ങിയ ബെഞ്ച് വ്യക്തമാക്കി. തനിക്ക് കാന്‍സറുണ്ടെന്ന സംശയമുണ്ടെന്നും ജാമ്യം അനുവദിക്കണമെന്നും ആവശ്യപ്പെട്ടാണ് സജ്ജന്‍ കുമാര്‍ സുപ്രിംകോടതിയെ സമീപിച്ചത്.
ജീവപര്യന്തം തടവിനാണ് തന്റെ കക്ഷിയെ കോടതി ശിക്ഷിച്ചതെന്നും അദ്ദേഹം നാളെ ജയിലില്‍ക്കിടന്ന് മരിച്ചാല്‍ വധശിക്ഷയ്ക്ക് വിധേയനായതിന് തുല്യമാണെന്നും സജ്ജന്‍ കുമാറിന്റെ അഭിഭാഷകന്‍ വികാസ് സിങ് വാദിച്ചു.
സജ്ജന്‍ കുമാറിന് ഇടക്കാല ജാമ്യം അനുവദിക്കരുതെന്നും വംശഹത്യ നടത്തിയ കുറ്റവാളിയാണ് അദ്ദേഹമെന്നുമായിരുന്നു സി.ബി.ഐക്കു വേണ്ടി ഹാജരായ സോളിസിറ്റര്‍ ജനറല്‍ തുഷാര്‍ മേത്തയുടെ നിലപാട്. തുടര്‍ന്ന് ജാമ്യം നല്‍കാന്‍ കഴിയില്ലെന്ന് കോടതി അറിയിക്കുകയായിരുന്നു.
തന്നെ അതിവേഗം ചികിത്സയ്ക്കായി അഡ്മിറ്റ് ചെയ്യണമെന്ന് കാണിച്ചാണ് സജ്ജന്‍ കുമാര്‍ ജാമ്യാപേക്ഷ നല്‍കിയത്. ഇതെത്തുടര്‍ന്ന് സജ്ജന്‍കുമാറിന്റെ ആരോഗ്യ സ്ഥിതി പരിശോധിച്ച് അറിയിക്കാന്‍ മാര്‍ച്ച് നാലിന് സുപ്രിംകോടതി എയിംസ് അധികൃതരോട് ആവശ്യപ്പെട്ടു. ഇതിന്റെ അടിസ്ഥാനത്തില്‍ എയിംസ് സമര്‍പ്പിച്ച റിപോര്‍ട്ടാണ് സുപ്രിംകോടതി ഇന്നലെ പരിഗണിച്ചത്.