തിരുവനന്തപുരം: നൈജീരിയയിലെ ലാഗോസിലും ഇറാഖിലെ ബസ്രയിലും കുടുങ്ങിക്കിടക്കുന്ന മലയാളികളെ നാട്ടിലെത്തിക്കാന്‍ നടപടി സ്വീകരിക്കണമെന്ന് പ്രതിപക്ഷ നേതാവ് രമേശ് ചെന്നിത്തല. ഇക്കാര്യം ആവശ്യപ്പെട്ട് ചെന്നിത്തല കേന്ദ്ര വിദേശകാര്യ മന്ത്രി എസ്.ജയശങ്കറിന് രണ്ട് കത്തുകള്‍ നല്‍കി. 

ലാഗോസില്‍  കുടുങ്ങിക്കിടക്കുന്ന 220 മലയാളികള്‍ കേരളത്തിലേക്ക് വരാന്‍ ഒരു ചാര്‍ട്ടേഡ് വിമാനം തയാറാക്കി നിര്‍ത്തിയിട്ടുണ്ട്. അതിന് കൊച്ചി വിമാനത്താവളത്തില്‍ ഇറങ്ങാനുള്ള അനുമതി കേന്ദ്രം നല്‍കണമെന്നാണ് ആദ്യത്തെ കത്തില്‍ ആവശ്യപ്പെട്ടിരിക്കുന്നത്. 

ഇറാഖിലെ ബസ്രയില്‍ കുടുങ്ങിയ 12 മലയാളികളെ നാട്ടിലെത്തിക്കാന്‍ നടപടിയുണ്ടാകണമെന്നാവശ്യപ്പെട്ടാണ് രണ്ടാമത്തെ കത്ത്. അവര്‍ ഇറാഖിലെ ഇന്ത്യന്‍ എംബസിയുമായി ബന്ധപ്പെട്ടപ്പോള്‍ ഏതാണ്ട് 250ഓളം ഇന്ത്യാക്കാര്‍ നാട്ടിലേക്ക് മടങ്ങാന്‍ രജിസ്റ്റര്‍ ചെയ്തിട്ടുണ്ടെന്നും കാത്തിരിക്കാനുമാണ് പറഞ്ഞത്. ഇറാഖില്‍ ഏറ്റവും കൂടുതല്‍ കൊവിഡ് ബാധിതരുള്ള പ്രദേശമാണ് ബസ്ര.